ქსელურ მარკეტებში დაიწყო „სოციალური კალათების“ განთავსება – რომელი პროდუქტების შეძენა იქნება შესაძლებელი ფასდაკლებით

ქსელურ მარკეტებში დაიწყო „სოციალური კალათების“ განთავსება და პირველადი მოხმარების პროდუქტების შეძენა ფასდაკლებით იქნება შესაძლებელი.

პირველი ეტაპისთვის სპეციალურად მოწყობილ კუთხეებში ფასდაკლებით გაიყიდება 15 სახეობის სასურსათო პროდუქტი. სოციალურ კალათაში შედის: ფქვილი, ბრინჯი, შაქარი, წიწიბურა, ქათამი, ტკბილეული, მაკარონი, რძის ნაწარმი და სხვა ყველაზე მოთხოვნადი პროდუქტები.

როგორც „ლიბრეს“ კომერციულმა დირექტორმა, გიორგი გოცირიძემ განაცხადა, პროდუქტები, რომლებზეც ფასდაკლება გავრცელდება, „ლიბრეს“ მაღაზიებში დამატებითი განთავსების ადგილებზე იქნება წარმოდგენილი.

„აქცენტს გავაკეთებთ სოციალურ და სამომხმარებლო კალათაზე. პირობითად, ბურღულის კატეგორიიდან, როგორიც არის მაკარონი, ფქვილი, ბრინჯი, შაქარი, წიწიბურა, ასევე რძის ნაწარმიდან, ხორცპროდუქტებიდან და ასე შემდეგ, პროდუქტები, რომლებიც ყველაზე ხშირად ხვდება სამომხმარებლო კალათაში. მსგავსი პროდუქტები მომხმარებელმა მარტივად რომ მოძებნოს ჩვენს ქსელსა და მაღაზიებში, წარმოდგენილი იქნება დამატებითი განთავსების ადგილებზე, კალათებში და მათ განსხვავებული ფასმაჩვენებლები ექნებათ“, – განაცხადა  გიორგი გოცირიძემ.

„ნიკორას“ საზოგადოებასთან ურთიერთობის ხელმძღვანელის, სალომე ჭელიძის განცხადებით, პროდუქტებზე აქციები ყოველკვირეულად განახლდება.

„შევიმუშავეთ კალათა, რომელიც მოიცავს ყოველდღიური მოხმარების პროდუქტებს. ამ კალათების უფრო გაიაფებასა და ხელმისაწვდომობასთან დაკავშირებით დავიწყეთ თანამშრომლობა მომწოდებლებთან. ამის საფუძველზე, უკვე 7 მაისიდან ჩაეშვა აქციები, რომლებიც ყოველკვირეულად განახლდება და ყოველ ხუთშაბათს მომხმარებლებს ახალ პროდუქტებს შევთავაზებთ განახლებული ფასით“, – განაცხადა სალომე ჭელიძემ.

ამასთან, „აგროჰაბის“ კომერციულმა დირექტორმა, ანი გახარიამ ისაუბრა, რა ზომები გატარდა იმისათვის, რომ მომხმარებელი კიდევ უფრო კომფორტულად გაერკვეს აქციაში.

„იმისთვის, რომ მომხარებელი კიდევ უფრო კომფორტულად გაერკვეს აქციაში, ყოველი ფასის გასწვრივ განთავსებული იქნება წარწერა „ტოპ ფასი“. ამის მიხედვით მომხმარებელი მარტივად მოახდენს ნავიგაციას ჩვენს ქსელში“, – განაცხადა ანი გახარიამ.

როგორც „გუდვილის“ დარბაზის მენეჯერმა, თინათინ დევაძემ განმარტა, მომხარებლის მოთხოვნიდან გამომდინარე, პერიოდულად  ჩანაცვლდება პროდუქტები, რომლებზეც გარკვეული შეთავაზებები გავრცელდება.

„ჩვენი კომპანიის შესაძლებლობის ფარგლებში სოციალური კალათის გარკვეულ პროდუქტებზე ხორციელდება გარკვეული შეთავაზებები. ესენია პირველადი მოხმარების პროდუქტები. რა თქმა უნდა, მომხარებლის მოთხოვნიდან გამომდინარე, ეს პროდუქტები ჩანაცვლდება სხვადასხვა ბრენდის თუ სახეობის მიხედვით“, – განაცხადა თინათინ დევაძემ.