საქართველოში თხილის იმპორტი გაძვირდა – სად ვყიდულობთ და რამდენად

2026 წლის იანვარ-მარტში საქართველოში თხილის იმპორტი წლიურად 130%-ით გაიზარდა, – ამის შესახებ ირკვევა სტატისტიკის ეროვნული სამსახურის მონაცემებიდან.

უფრო კონკრეტულად, 2025 წლის პირველ სამ თვეში ქვეყანაში 930.5 ათასი დოლარის ღირებულების 136 ტონა ნაჭუჭგაცლილი თხილი შემოვიდა, ეს კი მაშინ, როცა მიმდინარე წლის იანვარ-მარტში იმპორტირებულია 2.142 მლნ დოლარის ღირებულების 194 ტონა თხილი.

აღსანიშნავია, რომ საქართველოს თხილის იმპორტი დაახლოებით 62%-ით გაუძვირდა. კერძოდ, 2026 წლის საანგარიშო პერიოდში 1 კგ. თხილის საშუალო საიმპორტო ფასი გადასახადების გარეშე 11 დოლარი იყო, გასული წლის იანვარ-მარტში კი საშუალო ფასი 6.8 დოლარს შეადგენდა.

სად და რამდენად ვყიდულობთ თხილს

„საქსტატის“ მონაცემების მიხედვით, მიმდინარე წლის საანგარიშო პერიოდში საქართველოში თხილის იმპორტში უდიდესი წილი საფრანგეთზე მოდიოდა.

უფრო დეტალურად, 5 ქვეყანა, საიდანაც 2026 წლის იანვარ-მარტში ყველაზე მეტი ღირებულების თხილის იმპორტი განხორციელდა, ასე გამოყურება:

• საფრანგეთი – 468.8 ათასი დოლარის ღირებულების 30 ტონა;
• იტალია – 315.6 ათასი დოლარის ღირებულების 37 ტონა;
• საბერძნეთი – 288.8 ათასი დოლარის ღირებულების 22 ტონა;
• სლოვაკეთი – 263 ათასი დოლარის ღირებულების 22 ტონა;
• ესპანეთი – 244.9 ათასი დოლარის ღირებულების 22 ტონა.

აღსანიშნავია, რომ 5 მთავარი სავაჭრო პარტნიორიდან საქართველო 1 კგ. თხილს საშუალოდ ყველაზე იაფად იტალიიდან ყიდულობდა (8.5 დოლარი), ყველაზე ძვირად კი საფრანგეთიდან (15.6 დოლარი).

ამავე პერიოდში 1 კგ თხილის საშუალო საიმპორტო ფასი გადასახადების გარეშე საბერძნეთიდან 13.1 დოლარი, სლოვაკეთიდან – 12 დოლარი, ხოლო ესპანეთიდან 11 დოლარი იყო.

www.bpn.ge