ჯანდაცვის მინისტრთან შეხვედრაზე, რომელსაც მედიკოსები ესწრებოდნენ, სიტყვით ოზურგეთის კლინიკა ”მედალფას” დირექტორი, ექიმი დავით მდინარაძე გამოვიდა. დავით მდინარაძე პირველია, ვინც გურიის რეგიონში ვაქცინა გაიკეთა.
”ჩვენს კლინიკაში 260 თანამშრომელია, მათგან 120-ს კორონავირუსი უკვე გადატანილი აქვს, დანარჩენი 160 თანამშრომლიდან კი კორონავირუსის საწინააღმდეგო ვაქცინა მხოლოდ ოცმა მედიკოსმა გაიკეთა. ამ სამწუხარო სტატისტიკაში მნიშვნელოვანი როლი ჩვენი კოლეგა ექთნის გარდაცვალების ფაქტმა გამოიწვია, მაგრამ ფაქტია, რომ მიმართვიანობა ძალიან დაბალია. აი, ეხლა მაგალითად, სანამ თქვენთან შეხვედრაზე წამოვიდოდი, კლინიკაში ვაქცინაციისთვის მხოლოდ სამი ადამიანი იყო მოსული. გვენანება, რომ გავხსნათ ფალკონი, სამ ადამიანს გავუკეთოთ და შვიდი დოზა ფაქტიურად გადავღვაროთ. ვთხოვეთ იმ მოსულ ადამიანებს, თქვენს კოორდინატებს ჩავიწერთ,თქვენ წაბრძანდით სახლში, ჩვენ კი შევეცდებით ვაქცინაციის მსურველი შვიდი ადამიანი კიდევ ვიპოვოთ და მერე საკუთარი მანქანით მოგემსახურებით კლინიკაში მოგიყვანოთ და გაგიკეთებთ- თქო. თუმცა ყოველთვის ასე ხომ ვერ იქნება, ხომ არ შეიძლება რამე ფორმის მოფიქრება, რომ ვაქცინის ის დოზები, რომელიც შეიძლება გამოუყენებელი დაგვრჩეს, დავუშვათ, სხვა მსურველმა გაიკეთოს, რომ ვაქცინა ტყუილად გადასაღვრელი არ გახდეს?” – ამგვარად დასვა საკითხი ”მედალფას” დირექტორმა.
” კარგი ქენით, რომ სამი მსურველის შემთხვევაში ვაქცინის შვიდი დოზა არ გააფუჭეთ. ჩვენ განვიხილავთ იმ ფორმასაც, რომ ასეთ არაორდინალურ ვითარებაში არსებობდეს სარეზერვო სიები, რათა გახსნილი ფლაკონის სრულად ათვისება მოხდეს. სხვა ქვეყნებში არსი მსგავსი პრაქტიკა, მაგრამ ჩვენთან ჯერჯერობით ეს პროტოკოლი არ არის და იმედია იქნება”- ასე უპასუხა ჯანდაცვის მინისტრის მოადგილემ თამარ გაბუნიამ დავით მდინარაძის მიერ დასმულ საკითხს.
Loading ...