გადაწყვეტილება მიღებულია, ქობულეთის შემოვლითი გზა 4-ზოლიანად გადაკეთება. გარემოს ეროვნულმა სააგენტომ, პროექტის გარემოზე ზემოქმედების შეფასების (გზშ) პროცედურები უკვე დაასრულა და შესაბამისი გადაწყვეტილებაც გამოსცა.
გზშ-ის ანგარიშის მიხედვით, ქობულეთის არსებული შემოვლითი გზა იწყება შეკვეთილიდან და მთავრდება ჩაქვი-მახინჯაურის გვირაბებთან. ხოლო ქობულეთის არსებული შემოვლითი გზის ოთხზოლიან მაგისტრალად მშენებლობა/მოდერნიზაცია დაგეგმილია ქობულეთის და ოზურგეთის მუნიციპალიტეტების საზღვრებში. კერძოდ, მარშრუტის ფარგლებში გზა გაივლის სასოფლო-სამეურნეო დანიშნულების ნაკვეთებისა და საკარმიდამო ტერიტორიების მომიჯნავედ, რომელიც გადაკვეთს მდინარეებს: ნატანები, ჩოლოქი, ოჩხამური, აჭყვა, კინტრიში, დეხვა, ჩაქვისწყალი და სხვა მცირე ზომის ზედაპირული წყლის ობიექტებს. ამასთან, ბოლო მონაკვეთზე გზა განთავსდება ჩაქვი-მახინჯაურის გვირაბის სიახლოვეს.
„წარმოდგენილი დოკუმენტაციის თანახმად, საპროექტო გზის საერთო სიგრძეა დაახლოებით 30,7 კმ და დერეფანი პირობითად იყოფა ორ ლოტად: საწყისი 13 კმ სიგრძის მონაკვეთი სოფელ კაკუჩამდე (პირობითად ლოტი 1) და სოფელი კაკუჩადან ბოლო წერტილამდე (პირობითად ლოტი 2). საავტომობილო გზის დერეფანში გათვალისწინებულია დამატებითი კვანძების და არსებული გვირაბების პარალელურად ორი ახალი, ორზოლიანი გვირაბის მშენებლობა. ასევე დაგეგმილია ახალი ხიდების და გზაგამტარების მოწყობა.
ქობულეთის შემოვლითი გზა 4-ზოლიანად გადაკეთდება – სად გაივლის და რა დაჯდება მშენებლობა
გზშ-ის ანგარიშის მიხედვით, საპროექტო გზა დაახლოებით 14,6 კმ-ის მანძილზე მიუყვება არსებულ ორზოლიან გზას პარალელურად, ხოლო შემდგომ, გარკვეულ მონაკვეთებში, მრუდების გაუმჯობესების მიზნით, ორჯერ გადადის არსებული გზის მარჯვენა მხარეს.
საპროექტო გზაზე მაქსიმალური დასაშვები სიჩქარე იქნება 120 კმ/სთ“,- ვკითხულობთ დოკუმენტში.
ამასთან, გზშ-ის ანგარიშის თანახმად, პროექტის ხანგრძლივობად განსაზღვრულია დაახლოებით 4 წელი, ხოლო სამშენებლო სამუშაოების ხანგრძლივობად – დაახლოებით 24 თვე. მოდერნიზაციის პროექტის ფარგლებში დასაქმდება 400 ადამიანი.
შეგახსენებთ, რომ მიმდინარე წლის თებერვალში გარემოს ეროვნულმა სააგენტომ საავტომობილო გზების დეპარტამენტის მიერ წარდგენილი გზშ და თანდართული დოკუმენტები განიხილა და რიგი საკითხების დაზუსტება მოითხოვა.
17 მარტს კი გზების დეპარტამენტმა ქობულეთის შემოვლითი გზის ოთხზოლიან მაგისტრალად მოდერნიზაციის პროექტის გარემოზე ზემოქმედების ანგარიშთან დაკავშირებით გარემოს ეროვნული სააგენტოს მიერ მითითებული რიგი საკითხები დააზუსტა.
როგორც 2026 წლის სახელმწიფო ბიუჯეტის დოკუმენტიდან არის ცნობილი, 2026-2029 წლების განმავლობაში აღნიშნული გზის მშენებლობისთვის გათვალისწინებულია 480 მილიონი ლარის დახარჯვა.
www.bpn.ge
Loading ...