მოსკოვის ოლქის ქალაქ ხიმკისსა და მითიშჩიში დრონების თავდასხმების შედეგად სამი ადამიანი დაიღუპა, – ინფორმაციას რუსული მედია მოსკოვის ოლქის გუბერნატორზე ანდრეი ვორობიოვზე დაყრდნობით ავრცელებს.
„ხიმკიში ქალი დაიღუპა, როდესაც დრონი კერძო სახლს მოხვდა. კიდევ ერთი ადამიანი ნანგრევების ქვეშაა. ორი მამაკაცი დაიღუპა სოფელ პოგორელკში“, – დაწერა მან სოციალურ ქსელში.
რუსული მედიის ინფორმაციით, დრონებით თავდასხმა განხორციელდა ქალაქ დედოვსკიზეც, რის შედეგადაც სამი მამაკაცი და ერთი ქალი დაშავდა. ამასთან, აგროგოროდოკის დასახლებაში მრავალსართულიანი შენობა და ექვსი კერძო სახლი დაზიანდა. კრასნოგორსკის პუტილკოვოს მიკრორაიონში რამდენიმე ბინა დაზიანდა.
მოსკოვის მერმა სერგეი სობიანინმა განაცხადა, რომ უკრაინელმა ასევე სცადეს მოსკოვის ნავთობგადამამუშავებელ ქარხანაზე დრონებით თავდასხმა.
„წინასწარი ინფორმაციით, 12 ადამიანი დაშავდა. ძირითადად ნავთობგადამამუშავებელი ქარხნის საკონტროლო პუნქტთან ახლოს; დაშავდა მშენებლების ცვლა“, – განაცხადა მერმა.
რუსული მხარის ინფორმაციით, მათმა საჰაერო თავდაცვის ძალებმა ბოლო დღე-ღამის განმავლობაში 556 დრონი ჩამოაგდეს, მათგან დაახლოებით 130 მოსკოვის ოლქში.
Loading ...