რომელ ტერიტორიაზე შეიქმნება გურიის ახალი ეროვნული პარკი

გურიის რეგიონში მორიგი ეროვნული პარკი იქმნება. ამასთან დაკავშირებით დღეს სასტუმრო ‘’ოზურგეთი პლაზაში’’ პროექტის პრეზენტაცია მოეწყო.

როგორც ღონისძიებაზე ითქვა, პარკი კურორტ ბახმაროს მიმდებარედ, ოზურგეთისა და ჩოხატაურის მუნიციპალიტეტების ტერიტორიაზე შეიქმნება.

პროექტის ავტორებს მიაჩნიათ, რომ პარკის შექმნა ხელს რეგიონში არსებული ბუნებრივი რესურსების არამდგრადი გამოყენების აღმოფხვრას, ეკოსისტემის გაძლიერებას და ბიომრავალფეროვნების შენარჩუნებას შეუწყობს.

პროექტის ავტორები და მხარდამჭერები, ასევე, იმედოვნებენ, რომ ახალი ეროვნული პარკი, რომლის ფართობი 30,000 ჰა იქნება, ადგილობრივი მოსახლეობის შემოსავლების ზრდაზეც იმოქმედებს, რაც ეროვნული პარკის ტურისტული პოტენციალით არის ნაკარნახევი.

პრეზენტაციას გარემოს დაცვისა და სოფლის მეურნეობის მინისტრის მოადგილე ნინო თანდილაშვილი, გურიის გუბენრატორის მოადგილე ქეთი მოისწრაფიშვილი, დაცული ტერიტორიის სააგენტოს წარმომადგენლები და ბუნების დაცვის მსოფლიო ფონდის  კავკასიის ოფისის დირექტორი გიორგი სანადირაძე ესწრებოდნენ.

გურიის რეგიონში ახალი ეროვნული პარკის გარდა ორი პარკი მდებარეობს. პონტოს მუხის აღკვეთილი ჩოხატაურში, სადაც პონტოური მუხის უნიკალური ჯიში ხარობს და ასევე, კოლხეთის ეროვნული პარკი, რომელიც სამეგრელოს რეგიონის გარდა გურიას, კონკრეტულად კი ლანჩხუთის ტერიტორიასაც მოიცავს.

გურიის ახალი ეროვნული პარკის დაარსების პროექტს, საქართველოს გარემოს დაცვისა და სოფლის მეურნეობის სამინისტროს დელიგირებით, ბუნების დაცვის მსოფლიო ფონდის (WWF) კავკასიის ოფისი ახორციელებს. პროექტს, რომლის საერთო ღირებულება 520,530 ევროს შეადგენს. ფინანსურ მხარდაჭერას შვედეთის საელჩო უწევს.