რა პრინციპით იმოძრავებენ ოზურგეთიდან თბილისამდე მიკროავტობუსები

დღეიდან საქართველოში საქალაქთაშორისო ტრანსპორტი ამოქმედდა. გადაწყვეტილება უწყებათაშორისი საკოორდინაციო საბჭოს დღევანდელ სხდომაზე იქნა მიღებული, თუმცა კომენდანტის საათი კვლავ ძალაში რჩება.

სამარშრუტო მიკროავტობუსები გავიდა ოზურგეთიდანაც.  პოლიციის ე.წ. ძველ შენობასთან მდებარე ავტოსადგურიდან დღეს მიკროავტობუსები ყველა ტრადიციული მიმართულებით წავიდნენ. თუმცა მგზავრები შესამჩნევად ნაკლები იყო.

– დღეს მაინც პირველი დღეა და მგზავრთა სიმცირე გასაკვირი არ არის. თან ინფორმაცის ნაკლებობაა. როცა უკვე ყველას ეცოდინება, რომ საქალაქთაშორისო ტრანსპორტი ამოქმედდა, მგზავრებიც მოიმატებენ – უთხრა ”გურიაTV”-ს  ავტოსადგურის დირექტორმა შაკო ორაგველიძენ.

რაც შეეხება რკინიგზის სადგურთან მდებარე ავტოსადგურს, აქედან პირველი რეისი უკვე გავიდა, თუმცა მგზავრთა რაოდენობა შესამჩნევად დაკლებულია:

– პირველი მიკროავტობუსი ოთხი კაცით გავიდა, ავტობუსში კი მხოლოდ სამი მგზავრი იჯდა – აცხადებენ ავტოსადგურში. როგორც თავად ამბობენ, სავალდებულო რეგულაციებს ასრულებენ, რაც  დეზინფექციასა და ავტომობილში პირბადით ყოფნის ვალდებულებას გულისხმობს.

კომენდანტის საათმა სამარშრუტო მიკროავტობუსების განრიგში ცვლილებები გამოიწვია. აღნიშნული ავტოსადგურიდან თუ ადრე ოთხი რეისი 12:00 – ზე, 14:00 – ზე, 18: 00 – ზე და 20:00 – ზე გადიოდა, ახლა მხოლოდ 12 საათიანი და 14 საათიანი  – იანი რეისები იმუშავებს. გვიანი რეისები ჯერჯერობით არ გავა არც პოლიციის ე.წ. ძველ შენობასთან მდებარე ავტოსადგურიდანაც.