რას გულისხმობს ახალი აგროპროგრამა და როგორ უნდა მიიღოს ფერმერმა სახელმწიფოს თანადაფინანსება

2026 წლის 1-ელი ივლისიდან ფერმერული მეურნეობების ერთიანი რეესტრი ამოქმედდება, – ამის შესახებ დღეს პრემიერ-მინისტრმა ირაკლი კობახიძემ განაცხადა და განმარტა, რომ რეესტრი მთავრობას თითოეული ფერმერის საჭიროებების დანახვაში დაეხმარება.

აგროთანადაფინანსების პროგრამის პრეზენტაციისას კობახიძემ აღნიშნა, რომ დამკვიდრდება სისტემური მონიტორინგი, რათა პროგრამაში ცვლილებები საჭიროებების მიხედვით დროულად შევიდეს.

ამასთანავე, ახალი პროგრამით ერთიანდება აგროწარმოების ყველა საკვანძო მიმართულება. მთავრობის განცხადებით, მიზანი საშუალო ზომის მეურნეობების გაძლიერებაა.

რას ითვალისწინებს აგროთანადაფინანსების ახალი პროგრამა

აგროთანადაფინანსების პროგრამით გათვალისწინებულია ბენეფიციართა შერჩევის სისტემის დანერგვა, საკვალიფიკაციო მოთხოვნების შექმნა, სექტორების მიზნობრივი შერჩევა და შედეგების შეფასების სისტემის დანერგვა.

პროგრამის თანახმად, გაუმჯობესდება მონაცემთა ბაზრები, დაფინანსების სქემები და ინფორმირებული გადაწყვეტილებების მექანიზმები.

როგორც უკვე აღვნიშნეთ, დაგეგმილია ციფრული პლატფორმის შექმნა, რომელიც სოფლად არსებული საწარმოებისა და ფერმერების ერთიან ბაზას შექმნის. პროგრამის მიხედვით, ეს პლატფორმა ფერმერთა ჩართულობას, მიწის ნაკვეთების და კულტურების რეგისტრაციის სიზუსტეს, პროცედურები სტანდარტიზაციას და ავტომატიზაციას, ასევე, სახელმწიფო სისტემების ინტეგრაციას უზრუნველყოფს.

პროგრამა მოიცავს შემდეგ მიმართულებებს: პირველადი წარმოება, გადამამუშავებელი და შემნახველი საწარმოები, სასაკლაოების მოწყობა, შეღავათიანი აგროკრედიტი ძირითადი და საბრუნავი საშუალებებისთვის.

აქედან პირველადი წარმოების ფარგლებში აგროთანადაფინანსების პროგრამა გავრცელდება შემდეგ საქმიანობებზე:

• მრავალწლოვანი კულტურების გაშენება;
• სასათბურე მეურნეობის მოწყობა;
• მსხვილფეხა მეცხოველეობის ფერმის მოწყობა;
• წვრილფეხა მეცხოველეობის ფერმის მოწყობა;
• მეფრივნელეობის ფერმის მოწყობა;
• საფუტკრე მეურნეობის მოწყობა;
• მტკნარი წყლის აკვაკულტურის/მარიკულტურის მეურნეობის მოწყობა.

რაც შეეხება თანადაფინანსების მოცულობას, განისაზღვრა როგორც მინიმალური (100 000 ლარი), ასევე მაქსიმალური ზღვარი (2 000 000 ლარი). როგორც პრეზენტაციისას კობახიძემ განაცხადა, სახელმწიფო მზად არის, პირველად წარმოებაში აიღოს ხარჯების მინიმუმ 50%, ხოლო გადამუშავებასა და შენახვაში – 40%.

გარდა ამისა, პროექტის პრეზენტაციაზე აღინიშნა, რომ საზღვრისპირა და მაღალმთიან რეგიონებში არსებული ფერმერული მეურნეობებისა და ფერმერებისთვის წამახალისებელი ღონისძიებები იქნება გათვალისწინებული.

რა გზას გადის ფერმერი დაფინანსების მისაღებად?

იმისთვის, რომ პირმა აგროთანადაფინანსების პროგრამით ისარგებლოს, პირველ ეტაპზე, საჭიროა ფერმერული მეურნეობის და სოფლად არსებული საწარმოების ერთიან ბაზაში რეგისტრაცია.

ამის შემდეგ, ფერმერი ავსებს განაცხადს შესაბამისი ელექტრონული ფორმით, ტვირთავს მოთხოვნილ დოკუმენტებს და წარადგენს „ბიზნესგეგმას“.

www.bpn.ge