1918 წლის თურქეთის წინააღმდეგ ბრძოლაში დაღუპულ მებრძოლთა მემორიალის დადგმის ინიციატივას, სოფელ ოზურგეთში მხარს ,,პატრიოტთა ალიანსი’’ უჭერს. აღნიშნულის შესახებ განცხადება პარტიის ლიდერმა, შოთა გოგიბერიძემ ბრიფინგზე გააკეთა. მან მემორიალის დადგმა მნიშვნელოვან მოვლენად მიიჩნია, საქართველოს ისტორიის პატივისცემისა და ოზურგეთელი მებრძოლების უკვდავსაყოფად.
საინიციატივო ჯგუფმა კონსტანტინე შავიშვილმა, დათო მეფარიშვილმა და ბადრი თავდუმაძემ ოზურგეთის მუნიციპალიტეტის საკრებულოში შეიტანეს ინიციატივა სოფელ ოზურგეთში, 1918 წლის აპრილში თურქებთან ბრძოლაში დაღუპულ 37 გმირის ძმათა სასაფლაოზე ქანდაკების აღმართვის შესახებ. გრანიტის ქანდაკების მაკეტი მოქანდაკე ივანე ცისკარიძეს ეკუთვნის.
ჩვენი ორგანიზაცია იზრუნებს, რომ სპეციალურ ანგარიშზე საჭირო თანხები იქნას მობილიზებული. ჩვენ გვაქვს 1905 წელს, რუსებთან ბრძოლის ამსახველი მემორიალი ნასაკირალში, ამიტომ იმედია ანტითურქულ განწყობას არ დაგვწამებენ – თქვა ჟურნალისტებთან შოთა გოგიბერიძემ.
საუბარია 103 წლის წინ, 1918 წლის 11 აპრილს სოფელ ვაშნართან, ოსმალებსა და ქართველებს შორის ურთიერთშეტაკების შედეგად დაღუპულ გმირებზე. როგორც ცნობილია სახალხო გვარდიამ და ცხენოსანთა არტილერიამ ოსმალებს შეუტიეს და ვაშნარის ველზე გამართულ ბრძოლაში 11 აპრილს დაამარცხეს. გოგიბერიძემ ბრიფინგზე პარტიის სამომავლო გეგმებიც გააჟღერა. ,,პატრიოტთა ალიანსი’’ ადგილობრივ თვითმმართველობის არჩევნებში მონაწილეობას მიიღებს და მათ მერობის კანდიდატიც ეყოლებათ.