მსუბუქი ავტომობილებისთვის მართვის მოწმობის აღება მარტივდება. შს მინისტრის, სულხან თამაზაშვილის 20 მაისით დათარიღებულ დადგენილებაში ვკითხულობთ, რომ მძღოლობის კანდიდატმა თეორიულ გამოცდის ჩასაბარებლად საკმარისია 30 კითხვიდან 25-ს სწორად უნდა უპასუხოს და ამისთვის დრო 30 წუთია.
“B კატეგორიისა და B1 ქვეკატეგორიის სატრანსპორტო საშუალებათა მართვის უფლების მისაღებ თეორიულ გამოცდაზე მძღოლობის კანდიდატმა უნდა უპასუხოს 30 საგამოცდო ტესტს (ბილეთი). თეორიულ გამოცდაზე დადებითი შეფასების მისაღებად მძღოლობის კანდიდატმა ელექტრონული ტესტირებისათვის განსაზღვრული 30 წუთის განმავლობაში უნდა დააგროვოს მინიმუმ 25 ქულა,” — ვკითხულობთ დადგენილებაში.
გარდა ამისა, პრაქტიკულ გამოცდაზე შეცდომის დაშვების შემთხვევაში გამომცდელი მძღოლს შეცდომის გამოსასწორებლად “გონივრულ ვადას” მისცემს.
“გამომცდელის მიერ მძღოლობის კანდიდატს მიეცემა შესაბამისი მითითება (მაგ.: „გთხოვთ კიდევ ერთხელ შეამოწმოთ საგზაო მოძრაობისთვის მზადყოფნა“). გამომცდელის მიერ მძღოლობის კანდიდატს მითითება მიეცემა თავისუფალი თხრობით, თუმცა მითითება შინაარსობრივად უნდა შეესაბამებოდეს მძღოლობის კანდიდატის მიერ შესაბამისი უნარ-ჩვევის გამოვლენის შესაძლებლობის განმეორებით მიცემის მიზანს. ამასთან, გამომცდელი უფლებამოსილია გააჩეროს საგამოცდო ავტომობილი ან მძღოლობის კანდიდატს მისცეს საგამოცდო ავტომობილის გაჩერების მითითება,” — ვკითხულობთ განკარგულებაში.
რაც შეეხება მსუბუქ შეცდომებს, მისი რაოდენობა 12-ს მაგივრად 15 იქნება. აღნიშნული ცვლილებები ძალაში 15 ივნისიდან შევა.
შსს-ს მომსახურების სააგენტოს ცნობით, 22 მაისიდან მართვის უფლების მისაღები პრაქტიკული გამოცდის პირველი ეტაპის (მოედანი) წარმატებით ჩაბარებისთანავე, კანდიდატებს ეძლევათ შესაძლებლობა, პრაქტიკული გამოცდის მეორე ეტაპზე გასასვლელად სასურველი დრო ყოველგვარი ლოდინის გარეშე, სააგენტოს სტრუქტურულ ერთეულში დაჯავშნონ
Loading ...