სახელმწიფო მედიის ცნობით, თურქმა დეპუტატებმა დაამტკიცეს კანონპროექტი, რომელიც 15 წლამდე ბავშვებისთვის სოციალური მედიის პლატფორმებზე წვდომის შეზღუდვას ითვალისწინებს.
ეს კანონი ახალგაზრდების სახიფათო ონლაინ აქტივობებისგან დაცვის გლობალური ტენდენციის ნაწილია და ავსტრალიის მაგალითს მიჰყვება, რომელმაც სოციალური მედიის გამოყენებაზე ისტორიული შეზღუდვები გასულ წელს დააწესა.
თურქეთში კანონპროექტის მიღებას წინ უსწრებდა ტრაგედია სამხრეთ თურქეთში, ქალაქ ქაჰრამანმარაშში, სადაც 14 წლის ბიჭმა საშუალო სკოლაში სროლისას ცხრა მოსწავლე და ერთი მასწავლებელი მოკლა. პოლიცია თავდამსხმელის (რომელიც ასევე დაიღუპა) ონლაინ აქტივობას იძიებს, რათა მისი მოტივაცია დაადგინოს.
როგორც სახელმწიფო საინფორმაციო სააგენტო “ანადოლუ” იუწყება, კანონპროექტი სოციალური მედიის პლატფორმებს ასაკის გადამოწმების სისტემების დანერგვას, მშობელთა კონტროლის ინსტრუმენტების უზრუნველყოფას და საზიანოდ მიჩნეულ კონტენტზე სწრაფ რეაგირებას ავალდებულებს.
კანონპროექტის ძალაში შესასვლელად პრეზიდენტ რეჯეფ თაიფ ერდოღანს დასამტკიცებლად 15-დღიანი ვადა აქვს. ქაჰრამანმარაშის ტრაგედიის შემდეგ მან ბავშვთა უსაფრთხოებისა და კონფიდენციალურობისთვის ონლაინ რისკების შემცირების აუცილებლობაზე ისაუბრა.
“ჩვენ ვცხოვრობთ ეპოქაში, როდესაც ზოგიერთი ციფრული აპლიკაცია ჩვენი ბავშვების გონებას რყვნის, ხოლო სოციალური მედიის პლატფორმები, პირდაპირ რომ ვთქვათ, სანაგვე ორმოებად”, – განაცხადა მან ორშაბათს სატელევიზიო მიმართვაში.
მთავარმა ოპოზიციურმა “რესპუბლიკურმა სახალხო პარტიამ” გააკრიტიკა წინადადება და აღნიშნა, რომ ბავშვები დაცული უნდა იყვნენ “არა აკრძალვებით, არამედ უფლებებზე დაფუძნებული პოლიტიკით”.
კანონის თანახმად, ციფრულმა პლატფორმებმა, როგორებიცაა YouTube, TikTok, Facebook და Instagram, 15 წლამდე ბავშვებს ანგარიშების გახსნა უნდა აუკრძალონ და დანერგონ მშობელთა კონტროლი, რომელიც ბავშვების წვდომას დაარეგულირებს.
ონლაინ თამაშების კომპანიებს ასევე მოეთხოვებათ თურქეთში წარმომადგენლის დანიშვნა, რათა ახალი რეგულაციების დაცვა უზრუნველყონ. პოტენციური სანქციები თურქეთის კომუნიკაციების მარეგულირებლის მიერ დაკისრებულ ჯარიმებს მოიცავს.
შეგახსენებთ, რომ 2025 წლის დეკემბრიდან დღემდე ავსტრალიაში სოციალური მედიის კომპანიებმა უკვე გააუქმეს წვდომა დაახლოებით 4.7 მილიონ ანგარიშზე, რომლებიც ბავშვებს ეკუთვნოდათ.
გასულ თვეში ინდონეზიამ ასევე დაიწყო ახალი სამთავრობო რეგულაციის განხორციელება, რომელიც 16 წლამდე ბავშვებს ციფრულ პლატფორმებზე წვდომას უკრძალავს, სადაც ისინი პორნოგრაფიის, კიბერბულინგის, ონლაინ თაღლითობისა და დამოკიდებულების მსხვერპლი შეიძლება გახდნენ.
სხვა ქვეყნებიც, მათ შორის ესპანეთი, საფრანგეთი და გაერთიანებული სამეფო, ბავშვებისთვის სოციალურ მედიაზე წვდომის შესაზღუდად ზომებს უკვე განიხილავენ , რადგან იზრდება შეშფოთება დაურეგულირებელი სოციალური მედიის კონტენტის მავნე ზეგავლენის გამო.
www.bm.ge
Loading ...