მისისიპის უნივერსიტეტის პროფესორის, აშშ-ში მოღვაწე ქართველი ექიმის ზურაბ გურულის განცხადებით, ქვეყანა ვირუსის გავრცელებას ადრეულ ეტაპზე ეფექტურად გაუმკლავდა, თუმცა ზამთრის სეზონისთვის ვირუსთან ბრძოლის კრიტერიუმები და პროტოკოლები არ შემუშავდა. ამის შესახებ მან “პალიტრანიუსის” გადაცემა “360 გრადუსში” ისაუბრა.
მისი თქმით, იმის გათვლა, რომ ზამთრის პერიოდი მოახლოვდებოდა და ბუნებრივად დამძიმდებოდა ეპიდემიოლოგიური სიტუაცია, შეიძლებოდა.
გურულის განცხადებით, ამ შემთხვევაში უკვე სხვა პროტოკოლები და კრიტერიუმები იყო შესამუშავებელი.
“ვირუსს ადრეულ ეტაპზე ძალიან ეფექტურად გავუმკლავდით, რადგან არ მივიღეთ ეპიდემიის უკონტროლო გავრცელება. მაგრამ ეს დრო საჭირო იყო იმისთვის, რომ შექმნილიყო, ჩამოყალიბებულიყო კრიტერიუმები იმ დროისთვის, რომელიც გარდაუვალი იქნებოდა და მოვიდოდა, როცა გაიხსნებოდა ყველაფერი, ეპიდემია ისევ დაიწყებდა გავრცელებას, იმიტომ რომ ვირუსი არ გამქრალა. ვაქცინა არ იყო, შეიძლებოდა იმის გათვლა, რომ ზამთრის პერიოდი მოახლოვდებოდა და ბუნებრივად დამძიმდებოდა ეპიდემიოლოგიური სიტუაცია, პაციენტების რიცხვი მოიმატებდა. ამ დროისთვის შესამუშავებელი იყო სულ სხვა კრიტერიუმები და პროტოკოლები. იმედი მაქვს ყველაფერი მალე დალაგდება და პირველადი რგოლიც უფრო ეფექტურად ამუშავდება”, – განაცხადა გურულმა.
რაც შეეხება საველე ჰოსპიტლების გახსნასთან დაკავშირებულ კითხვას, ქართველი ექიმის თქმით, ის ამის აუცილებლად ვერ ხედავს, მაშინ როცა არსებობს შენობა, სადაც პაციენტების მოთავსება შესაძლებელია.
“ლოკდაუნი დაწესდა იმისთვის, რომ ჰოსპიტალური სექტორი განგვეტვირთა და კონტროლის ქვეშ დაგვექვემდებარებინა. ნებისმიერი შეზღუდვის შედეგი ჩანს მინიმუმ 2 კვირის შემდეგ. ნუ გავუსწრებთ მოვლენებს, თუ ყველა ერთად ვიმუშავებთ და მოვახერხებთ ეპიდემიოლოგიური სიტუაციის მაქსიმალურ კონტროლს, იმედი მაქვს, ხანმოკლე მოშვება არ გამოიწევს ეპიდემიოლოგიური სიტუაციის ისეთ გაუარესებას, რომ მერე უფრო მკვეთრი შეზღუდვები გახდეს საჭირო”,- განაცხადა გურულმა.
www.interpressnews.ge