საქართველოს მასშტაბით ეროვნული სატყეო სააგენტოს თანამშრომლებმა 2026 წლის აპრილში ხე-ტყის უკანონო მოპოვებისა და ტრანსპორტირების 72 ფაქტი გამოავლინეს. მათ შორის, 9 შემთხვევა გურიის რეგიონში დაფიქსირდა.
სააგენტოს ინფორმაციით, სამართალდარღვევების შედეგად ამოღებულია სხვადასხვა სახეობის 76 კუბურ მეტრამდე საშეშე და სამასალე მერქანი, რომელიც სააგენტოს „საქმიან ეზოებში“ განთავსდა.
ხე-ტყის უკანონო მოპოვების ფაქტები ქვეყნის სხვადასხვა რეგიონში გამოვლინდა. ყველაზე მეტი შემთხვევა ქვემო ქართლში — 20, კახეთში — 15, ხოლო გურიაში — 9 დაფიქსირდა.
ეროვნული სატყეო სააგენტოს ცნობით, გამოვლენილი სამართალდარღვევებიდან 9 ფაქტი სისხლის სამართლის დანაშაულის ნიშნებს შეიცავს. შესაბამისი მასალები შემდგომი რეაგირებისთვის სამართალდამცავ ორგანოებს გადაეგზავნა.
ამავე ინფორმაციით, 2026 წლის იანვარ-აპრილის პერიოდში ქვეყნის მასშტაბით ხე-ტყის უკანონო მოპოვების სულ 263 ფაქტი გამოვლინდა.
Loading ...