''ბავშვივით იტირა, რომ დაინახა..'' – სოფელ ნატანებში მამის მკვლელობისთვის შვილი დააკავეს

ოზურგეთის მუნიციპალიტეტის სოფელ ნატანებში 21 იანვარს მომხდარი მკვლელობა გახსნილია. 55 წლის ამირან ფალავანდიშვილის მკვლელობის ბრალდებით გურიის პოლიციამ მისი ვაჟი დააკავა. 

გამოძიებით დადგინდა, რომ ბრალდებულმა მიმდინარე წლის 21 იანვარს, ოზურგეთის მუნიციპალიტეტის სოფელ ნატანებში, მშობლების საცხოვრებელ სახლში, ოჯახური კონფლიქტის დროს, მამას  ცივი იარაღის გამოყენებით რამდენიმე ჭრილობა მიაყენა და მიიმალა. დაჭრილი მამაკაცი შემთხვევის ადგილზე გარდაიცვალა.

აღნიშნული ტრაგედიის სოფელში შემთხვევის დღესაც გაოგნებულები იყვნენ და გაოცებას ვერ მალავენ ნატანებელები დღესაც, როცა ამირან ფალავანდიშვილის მკვლელობაში ბრალდებულის სახით პოლიციამ  მისი ვაჟი დააკავა.

”გასაოცარი ამბავია. ძალიან გვიკვირს. ძალიან კარგი ურთიერთობა ჰქონდა მამა-შვილს. ნატანებში თხილის და მანდარინის საკრეფად ჩამოდიოდა ხოლმე ამირანი და შვილიც მოჰყვებოდა დასახმარებლად. ისეთი წყნარი და წესიერი ბიჭი იყო, როგორ შეიძლებოდა ეს ჩაედინა, ვერ გაგვიგია. აქ ამირანს ძმა ჰყავს, რომელიც ლოგინად არის ჩავარდნილი. როცა ამირანის შვილი დააკავეს და დანაშაულის ადგილზე მოიყვანა პოლიციელებმა, ყველაფერი თავიდან განუახლდა საწყალ კაცს და ბავშვივით იტირა, რომ დაინახა” – ჰყვებიან მეზობლები.

შეგახსენებთ, რომ დანაშაული 2021 წლის 21 იანვარს მოხდა.

 

ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის და ცეცხლსასროლი იარაღის მართლსაწინააღმდეგო შეძენა-შენახვა-ტარების ფაქტზე გამოძიება საქართველოს სსკ-ის 11 პრიმა-109-ე მუხლის მე-2 ნაწილის „ვ“ ქვეპუნქტით და 236-ე მუხლის მე-3 და მე-4 ნაწილებით მიმდინარეობს.

დანაშაული 13-დან 17 წლამდე ვადით თავისუფლების აღკვეთას ითვალისწინებს.

კომენტარები