''ასტრაზენეკას'' მეორე დოზა დეფიციტშია – რა ხდება ოზურგეთში და როგორ უნდა მოიქცნენ რევაქცინაციაზე რეგისტრირებულები

გურიის რეგიონში, ისევე როგორც მთელ საქართველოში ვაქცინა ”ასტრაზენეკა” დეფიციტური გახდა. როგორც ცნობილი გახდა, 22 და 23 ივნისს არსებული ჯავშნები აღნიშნული ვაქცინის, როგორც პირველ, ასევე, მეორე დოზაზე, ოზურგეთში გაუქმდა. ხოლო დანარჩენ მოქალაქეებს, რომელთაც ჯავშნები პირველი დოზის გაკეთებიდან 4-9 კვირებზე ჰქონდათ გაკეთებული, ვაქცინაცია 10-12 კვირაზე გადაეწიათ.

დაავადებათა კონტროლის ეროვნული ცენტრის გურიის განყოფილების ხელმძღვანელის არჩილ მჟავიას თქმით, ამის გამო პირველი დოზით ვაქცინირებულებს პრობლემა არ შეექმნებათ, რადგან ”ასტრაზენეკას” რევაქცინაცია სწორედ 12 კვირამდეა გათვლილი.

”12 კვირამდე ჩვეულებრივად შეუძლიათ ჩაიტარონ აცრა, ამით მათი ვაქცინაციის ვადა არ დაირღვევა. ხოლო პირველ დოზაზე დარეგისტრირებულ პირებს შეუძლიათ ”სინოვაკით” აიცრან ან დაელოდონ ”ასტრაზენეკას”, რომელიც მალე შემოვა” – განუცხადა ”გურიაTV”-ს არჩილ მჟავიამ.

შეფერხების მიზეზად მომწოდებლის მიერ ვაქცინის მოწოდების ვადის დარღვევა დასახელდა. ამირან გამყრელიძის თქმით, 43 000 დოზა „ასტრაზენეკა“ ჯერ მაისის ბოლოს უნდა მიეღო ქვეყანას, შემდეგ ივნისის დასაწყისში, ბოლო თარიღად 22 ივნისი დასახელდა, თუმცა, აღმოჩნდა, რომ მოლოდინი ამჯერადაც გაცრუვდა.

რაც შეეხება ”სინოვაკს”, ამ ვაქცინის მეორე დოზაზე ჯერჯერობით არანაირი პრობლემა არ არსებობს.

კომენტარები