“ჯორჯიან მანგანეზმა” 90-მდე მუშა სამსახურიდან გაათავისუფლა

ჭიათურაში ღია კარიერებზე, მძიმე ტექნიკაზე დასაქმებული 90-მდე თანამშრომელი სამსახურის გარეშე რჩება.

“დამსაქმებელი ეუბნება: კონკრეტულად შენი უფროსი ვინ არის, არ ვიცი, უბრალოდ აღარ გვჭირდებით, თქვენი სამსახური აღარ გვჭირდება, სხვას გადაეცა. სხვა უნდა ვამუშაოთ, ოღონდ არა იმ რაოდენობით, რამდენიც იყავით“, – განაცხადა ჭიათურის პროტესტის ერთ-ერთმა ლიდერმა დავით ჩინჩალაძემ ფეისბუკგვერდ “მაღაროელზე“ პირდაპირი ჩართვისას.

ჭიათურის პროტესტი გრძელდება. მონაწილეები 29 აპრილს დაკავებული თანამებრძოლების – თენგო გველესიანის, არჩილ ჭუმბურიძის, მერაბ სარალიძის და გიორგი ნეფარიძის განთავისუფლებას მოითხოვენ.

უკვე მეხუთე დღეა, რაც ჭიათურაში ოთხი ადამიანი შიმშილობს. 21 ივნისს მაღაროელმა მირზა ლოლაძემ პროტესტის ნიშნად პირი ამოიკერა. საპატიმროში შიმშილობს დაკავებული მერაბ სარალიძე.

წყარო: ინფოიმერეთი