ხორბლის ფასი შემცირდება – ფასი, შესაძლოა, გარკვეულ პროდუქტებზეც შემცირდეს

მაღალი ფასები და ინფლაცია კვლავ ერთ-ერთი მთავარი გამოწვევაა მსოფლიოში. ოფიციალური სტატისტიკით, 2022 წლის სექტემბერში წინა თვესთან შედარებით ინფლაცია საქართველოში 0.8 პროცენტი, ხოლო წლიური ინფლაცია 11.5 პროცენტი იყო. ტრადიციულად, ინფლაციის ზრდაზე ყველაზე დიდი გავლენა სურსათის გაძვირებამ მოახდინა. სურსათისა და უალკოჰოლო სასმელების ჯგუფში ფასები სექტემბერში 17.6 პროცენტით გაიზარდა.

გაძვირებულია პური და პურპროდუქტები – 32.8 პროცენტი, რძე, ყველი და კვერცხი – 23.3 პროცენტი, მინერალური და წყაროს წყალი, უალკოჰოლო სასმელები და ნატურალური წვენები – 22.5 პროცენტი, ფასი გაიზარდა ზეთსა და ცხიმზე – 21.2 პროცენტი, ყავაზე, ჩაისა და კაკაოზე – 18.9 პროცენტი.

გაძვირდა თევზეული – 16.5 პროცენტი, შაქარი, ჯემი და სხვა ტკბილეული -15.8 პროცენტი, ხორცი და ხორცის პროდუქტები – 9.8 პროცენტი, ხილი და ყურძენი – 9.6 პროცენტი;

14.1 პროცენტით გაიზარდა ფასები ტრანსპორტის ჯგუფში.

გარკვეულ პროდუქტებზე ფასების შესაძლო შემცირების მოლოდინს არ გამორიცხავს სოფლის მეურნეობის მინისტრი, რასაც მისი შეფასებით გავლენა უნდა ჰქონდეს ინფლაციაზეც.

მთავრობაში ამბობენ, რომ ფასების ზრდის ტენდენცია არის მთელ მსოფლიოში და საქართველო ვერ იქნება გამონაკლისი. თუმცა, ოთარ შამუგიასთვის დადებითი ფაქტორია, რომ ხორბალზე ფასების შემცირების დინამიკა გამოიკვეთა, რამაც, მინისტრის თქმით, უკვე მოახდინა გავლენა ჩვენს ბაზარზეც და მწარმოებლების გარკვეულმა ნაწილმა 10 თეთრით შეამცირა ფასი.

შამუგია ფიქრობს, რომ ხორბლის მცირედით გაიაფებამ შესაძლოა სხვა, გარკვეული პროდუქტების ფასების შემცირებაც გამოიწვიოს. მაღალ ინფლაციას, როგორც გამოწვევას, საქართველოს მთავრობის შეფასებით, ორნიშნა ეკონომიკური ზრდა აბალანსებს.