ხმაური თსუ-ში – სტუდენტებს გამთენიისას დაცვის თანამშრომლები და ერთი უცნობი პირი დაუპირისპირდნენ

თსუ-ში, სადაც სტუდენტები გაყალბებული არჩევნების წინააღმდეგ გამოდიან და 2 დღეა აუდიტორია აქვთ დაკავებული, ხმაური და დაპირისპირება იყო. გამთენიისას, შენობაში მყოფ სტუდენტებს დაცვის თანამშრომლები დაუპირისპირდნენ.

როგორც ახალგაზრდები ჰყვებიან, სტუდენტებს, რომლებიც უნივერსიტეტში ღამეს ათენებენ, შიდა სივრცეში გადაადგილება შეუზღუდეს, რაც გააპროტესტეს, სწორედ ამას მოყვა დაპირისპირებაც. ახალგაზრდები ამბობენ, რომ დაცვის თანამშრომლებს შორის იყო ერთი უცნობი პირიც, რომელიც ყველაზე მეტად აქტიურობდა. შედეგად, სამი ადამიანი დაშავდა და სასწრაფოს გამოძახება გახდა საჭირო.

“აუდიტორიიდან ცხვირი არ გამოყოთო, მხოლოდ საპირფარეშოში თუ გახვალთო. ამის გასაპროტესტებლად გადავწყვიტეთ რომ გავსულიყავით და რაღაც ლოკაციებზე დავმდგარიყავით. მოვარდნენ და ფიზიკური შეხება დაიწყეს.

მეორე სიტუაცია ისაა, რომ დაგვიზარალდა 2 გოგონა და 1 ბიჭი. მათ შემთხვევაში ასეთი ისტორიაა, რომ ერთ-ერთს დაემართა ემოციური შოკი, ერთ-ერთი გოგონა წააქციეს და წიხლები ურტყეს. ბიჭი ჰყვება, რომ ასთმა დაეწყო წაიქცა და თავი ჩამოარტყა. ახლა ყველა კარგადაა, კრიტიკულად არცერთი არ იმყოფება.” – აცხადებს პროტესტის ერთ-ერთი მონაწილე სტუდენტი ზვიად ცეცხლაძე.