„ხელვაჩაურის წყლის“ ყოფილი დირექტორი ციხეში გარდაიცვალა

ციხეში სასჯელის მოხდის დროს მსჯავრდებული ვლადიმერ [დავით] მიქელაძე გარდაიცვალა. ის „ხელვაჩაურის წყლის“ ყოფილი დირექტორი იყო და სკანდალური „520 ათასი ლარის მითვისების“ საქმის გამო გაასამართლეს.

ინფორმაცია მისი გარდაცვალების შესახებ ადვოკატმა დაადასტურა. ადვოკატის თქმით, ვლადიმერ მიქელაძე 68 წლის იყო და ჯანმრთელობის პრობლემები აწუხებდა. ის 11 სექტემბერს გარდაიცვალა.

ვლადიმერ [დავითი] მიქელაძეს ბათუმის საქალაქო სასამართლოში მოსამართლე ლევან ყოლბაიამ 2023 წლის 6 ივლისს 7 წლით თავისუფლების აღკვეთა მიუსაჯა. შპს „ხელვაჩაურის წყლის“ ყოფილ დირექტორს სამსახურებრივი მდგომარეობის გამოყენებით, დიდი ოდენობით თანხის მითვისებას, სამსახურებრივი უფლებამოსილების ბოროტად გამოყენებას, სამსახურებრივი სიყალბისა და ყალბი საგადასახადო დოკუმენტის დამზადება-გამოყენებას ედავებოდნენ.

ვლადიმერ მიქელაძე „ხელვაჩაურის წყლის“ დირექტორი იყო 2018 წლიდან 3 წლის განმავლობაში. მას პროკურატურა განსაკუთრებით დიდი ოდენობით თანხის ჯგუფურად მითვისებას ედავებოდა სხვადასხვა სამოხელეო და ფინანსურ დანაშაულთან ერთად. მოსამართლემ მხოლოდ ფულის გათეთრების ნაწილში არ ცნო ვლადიმერ მიქელაძე დამნაშავედ.

ვლადიმერ მიქელაძემ სასამართლო პროცესზე ამხილა ხელვაჩაურის ყოფილი მერი ჯუმბერ ვარდმანიძე, თუმცა ამ დრომდე პროკურატურას, თავისივე შეფასებით „ჯგუფურად ჩადენილი“ დანაშაულისთვის, ვლადიმერ მიქელაძის გარდა სხვა არავინ დაუსჯია.

ერთ-ერთ სასამართლო პროცესზე ვლადიმერ მიქელაძემ თქვა, რომ 520 ათასი ლარიდან ჯამში 288 ათასი ლარი ხელვაჩაურის ყოფილ მერს, ჯუმბერ ვარდმანიძეს ხელზე გადასცა. ასევე პროკურატურამ ჯუმბერ ვარდმანიძეს კითხვები დაუსვა აზარტულ თამაშებთან დაკავშირებითაც. ამ ინფორმაციების გასაჯაროების შემდეგ ვარდმანიძემ  თანამდებობა დატოვა – ის აჭარის განათლების მინისტრის მრჩევლის პოზიციაზე მუშაობდა.

მოწმეების თქმით, ორგანიზაციაში ფიქციურად იყო დასაქმებული ხელვაჩაურის მერის მოადგილის, კახაბერ ფუტკარაძის შვილიც, ისევე როგორც ათეულობით სხვა ადამიანი. ამ ინფორმაციის გასაჯაროების შემდეგ თანამდებობა დატოვა კახაბერ ფუტკარაძემაც.