2025 წლის იანვარში სტანდარტული იმერული ხაჭაპურის მომზადება წლიურად 6.1%-ით გაძვირდა, თვის ჭრილში კი მცირედი, 0.2%-ით გაიაფდა. უფრო კონკრეტულად, ISET-ის კვლევის მიხედვით, ერთი ხაჭაპურის მომზადება იანვარში საშუალოდ 7.02 ლარი ჯდებოდა.
ანგარიშის თანახმად, თვიური შემცირება გამოწვეული იყო ფქვილის ფასი 3.9%-იანი კლებით.
„აღსანიშნავია, რომ გლობალურ ბაზარზე ხორბლის ფასი ოქტომბრიდან მცირდება, მსოფლიოში რეკორდული მოსავლის გამო. საერთაშორისო ფასების ცვლილებების ადგილობრივ ბაზრებზე ასახვისთვის საჭირო დროის გათვალისწინებით, ფასის აღნიშნული ვარდნა მოსალოდნელი იყო. ამასთან, საახალწლო სეზონის პიკის შემდეგ, იანვარში, ხაჭაპურის ინგრედიენტების უმეტესობამ მცირედი დეფლაცია განიცადა, გამონაკლისს კარაქი (+3.1%) და კვერცხი (+4.3%) წარმოადგენდა“, – აღნიშნულია კვლევაში.
ამასთანავე, ცალკეული ინგრედიენტების ანალიზი გვიჩვენებს, რომ უმეტესობის ფასი წლიურად გაიზარდა: კარაქი (+15.1%), ყველი (+9.5%), საფუარი (+4.5%) და რძე (+1.3%). თუმცა, ამავე პერიოდში კვერცხის (-6.5%) და ფქვილის (-0.2%) ფასებმა კლება აჩვენა.
www.bpn.ge
Loading ...