ხაჭაპურის მომზადება გაძვირდა

ივნისში ხაჭაპური მომზადება წლიურად 4.7%-ით გაიზარდა. ISET-ის კვლევის მიხედვით, მიუხედავად წლიური ზრდისა, ხაჭაპურის ინდექსი მეოთხე თვეა შემცირებას განაგრძობს.

უფრო კონკრეტულად, კვლევის თანახმად, ერთი სტანდარტული იმერული ხაჭაპურის მომზადების საშუალო ღირებულება ივნისში 6.28 ლარს შეადგენდა.

„გასული წლის იმავე თვესთან შედარებით, ინგრედიენტების ნაწილზე ფასები გაიზარდა. ყველაზე მეტად (7.7%-ით) ყველის ფასი გაიზარდა, მას მოჰყვა კვერცხი (+5%) და კარაქი (+3.6%). თუმცა ამ ფონზე ფქვილის (-2.5%), რძისა (-1.1%) და საფუარის (-0.5%) ფასი წლიურ ჭრილში, პირიქით, შემცირდა.

თვიურ ჭრილში ძირითადი ინგრედიენტების ფასები შემცირდა. გამონაკლისი იყო კარაქი, რომლის ფასიც 2.3%-ით გაიზარდა. ყველის ფასი 3.1%-ით შემცირდა, რძის – 0.6%-ით. ეს კლება მეტწილად სეზონურია და წლის ამ პერიოდში რძის ადგილობრივი წარმოების ზრდაზე მიუთითებს“, – ვკითხულობთ ISET-ის კვლევაში.

„ყველაზე მეტად ყველის ფასი გაიზარდა, მას მოჰყვა კვერცხი და კარაქი“

აღსანიშნავია ისიც, რომ ყველის ფასების ყველაზე მკვეთრი კლება ქუთაისში აღინიშნა, წლიური 13.3%, ხოლო თვის ჭრილში 9.3% შეადგინა.

„რადგან იმერეთი საქართველოში ყველაზე მსხვილი რძის მწარმოებელი რეგიონია, ყველის ფასების სეზონური რყევები უფრო გამოხატული ხდება ქუთაისში, ვიდრე ქვეყნის სხვა ნაწილებში. ეს ტენდენცია მიუთითებს, რომ ხაჭაპურის ინდექსმა შეიძლება გააგრძელოს კლება მომავალ თვეებში, რადგან ქუთაისში ყველის ფასების კლება, ალბათ, მთელი ქვეყნის მასშტაბით იქონიებს გავლენას ფასებზე“, – წერენ კვლევის ავტორები.

www.bpn.ge