წალენჯიხაში, სადღესასწაულოდ მორთულ ქოლგებს პროტესტი მოჰყვა

წალენჯიხაში პროტესტი მოჰყვა სადღესასწაულო მორთულობის სახით ფერადი ქოლგების დაკიდებას.

რამდენიმე მამაკაცმა ამწე კალათის დახმარებით ჩამოხსნა ორი ფერადი ქოლგა, რომელიც „წალენჯიხა-ტერენტობასთან” დაკავშირებული სადღესასწაული დეკორაციის ნაწილის იყო. ჟურნალისტებთან საუბარში თავისი საქციელი ასე განმარტეს, რომ “ლგბტ პროპაგანდას ეწინააღმდეგებიან”.

როგორც მუნიციპალიტეტის მერის მოადგილე თამარ ბელქანიამ განაცხადა, ქოლგები მერიისგან დაუკითხავად ჩამოხსნეს ჰომოფობიური და პრორუსული პოლიტიკური პარტია “კონსერვატიული მოძრობის” ორგანიზაციის, “ალტ-ინფოს“ წარმომადგენლებმა.

მუნიციპაიტეტში დღეს „წალენჯიხა-ტერენტობას“ აღნიშნავენ. დღესასწაულთან დაკავშირებით წალენჯიხის ცენტრში, ღია სივრცეში და პოეტ ტერენტი გრანელის სახლ-მუზეუმში სხვადასხვა კულტურული ღონისძიებებია დაგეგმილი. ტერენტი გრანელისადმი მიძღვნილი ღონისძიება ყოველ 10 ოქტომბერს, პოეტის გარდაცვალების დღეს იმართება.

ეს პირველი შემთხვევა არ არის, როცა ფერებში ქოლგების გამოჩენას უპისპირდებიან. 2023 წლის მაისში, თბილისში გლდანის პარკის ადმინისტრაციამ ჩამოხსნა მრავალფეროვანი ქოლგები. ადმინისტრაციაში მაშინ რადიო თავისუფლებას უთხრეს, რომ შეაჩერეს დეკორაციების მოწყობა, ვინაიდან არ სურთ “საზოგადოებაში აგრესიის გაღვივება და სიბრაზის გამოწვევა”.

წყატო – რადიო თავისუფლება