ოზურგეთში, ჭადრების ბაღში მედიის წარმომადგენლებმა, არასამთავრობო სექტორმა და მოქალაქეებმა მდუმარე აქცია გამართეს. აქციის მონაწილეებმა სოლიდარობა “TV პირველს” და მთლიანად მედიას ოპერატორის ლექსო ლაშქრავას გარდაცვალების გამო გამოუცხადეს და 5 ივლისის მოვლენების სწრაფი და ობიექტური გამოძიება მოითხოვეს. როგორც აქციის მონაწილეები აცხადებენ, 5 ივლისს მომხდარმა ძალადობამ საქართველო დემოკრატიული განვითარების გზაზე საკმაოდ შეაფერხა და ქვეყნის დასავლურ ორიენტაციას სერიოზული პრობლემები შეუქმნა. აქციაზე გაჟღერდა პრემიერ-მინისტრისა და ხელისუფლების გადადგომის მოთხოვნაც.
ოთარ რევიშვილი, მოქალაქე:
” ჩვენ ვუერთდებით პროტესტის იმ ტალღას, რომელიც მთელ ქვეყანაშია. ვაპროტესტებთ იმ ამაზრზენ ძალადობას, რომლის დროსაც 50-ზე მეტი ჟურნალისტი დაშავდა, არის გარდაცვლილიც. მინდა მივუსამძიმრო მის ოჯახს და ტქვენ – ჟურნალისტებს. ძალიან მძიმე დღეები უდგას ჩვენმს ქვეყანას. ეს არის ჩვენი ქვეყნის დემოკრატიულ განვითარებაზე შეტევა. რეალურად ხელისუფლებამ უნდა აიღოს პასუხისმგებლობა და უნდა გადადგეს, როგორც პრემიერ-მინისტრი, ასევე შინაგან საქმეთა მინისტრი. იმ სიტუაციამ რაც თბილისში მოხდა, დაგვანახა, რომ ჩვენ სახელმწიფო ინსტიტუციები არ გვაქვს.”
ნოდარ გოგუა, მოქალაქე:
”ძალიან ვღელავ, ის ტრაგიკული სირცხვილი, რომელიც 5 ივლისს მოხდა, გაგრძელდა უარესი ტრაგედიით. არა მგონია, ნორმელური ადამიანი ამ ყველაფრით შეძრული არ იყოს. ეს ვითარება როგორმე უნდა შეიცვალოს, აუცილებლად მშვიდობიანად, მაგრამ უნდა შეიცვალოს. მედია მოგვწონს, არ მოგვწონს, კარგია თუ ცუდია, ამაზე მგონი ველურებიც აღარ საუბრობენ და გული მტკივა რომ ჩემს ქვეყანაში ასეთი დამოკიდებულებები იკვეთება მედიის მიმართ. ესენი არიან ადამიანები, რომლებიც ავად თუ კარგად, ჩვენ გვაცნობენ რა ხდება ქვეყანაში, თუ არ მოგვწონს, ძალადობისგან მაინც უნდა შევიკავოთ თავი. რამდენი უნდა დაიღუპოს, რამდენი უნდა გაილახოს, ლექსო ხომ თავის მოვაკლეობას ასრულებდა, ამის შემდეგ როგორ შეიძლება ვინმეს ენა მოუბრუნდეს მედიაზე ცუდის სათქმელად.”
Loading ...