“ჩვენ ვიწყებთ წინააღმდეგობის მოძრაობას, რომელიც იქნება საყოველთაო”- მოძრაობა თავისუფლების მოედანი

კოალიცია ძლიერ საქართველოში შემავალ მოძრაობა თავისუფლების მოედანში აცხადებენ, რომ არჩევნები გაყალბდა და ისინი წინააღმდეგობის მოძრაობას იწყებენ.

“ჩვენ ვიწყებთ წინააღმდეგობის მოძრაობას, რომელიც იქნება საყოველთაო, მშვიდობიანი, დემოკრატიული და კანონიერი. ამ მოძრაობის ადგილი ყველგან იქნება. ჩვენ ვიმოქმედებთ ქუჩებშიც, აუდიტორიებშიც, პარკებშიც – და არა მხოლოდ თბილისში, საქართველოს ყველა რეგიონში. შევეცდებით, არჩევნების გაყალბება გამოვიძიოთ. იმ ადამიანების იდენტიფიცირებას მოვახდენთ, ვინც ამ გაყალბებაში მონაწილეობდა. შევზღუდავთ ხელისუფლების წევრებსა და მათ მოქმედებებს. საჯარო სივრცეებში ახალი ტიპის აქციებს ჩავატარებთ – ეს არ იქნება მხოლოდ რუსთაველზე მასობრივი აქციები. ეს ისეთი აქციები იქნება, რომელიც ადამიანებს იმას დაანახებს, თუ რა მოხდა საქართველოში და ამაზე მათი რეაგირება რატომ არის მნიშვნელოვანი”. – თქვა მოძრაობის წევრმა, სიმონ ჯანაშიამ.

მოძრაობის ლიდერი, ლევან ცუცქირიძე ამბობს, რომ ისინი ყველა ხმას ბოლომდე დაიცავენ.

“ჩვენ ვთვლით, რომ არჩევნების ის შედეგი, რაც ცესკომ გამოაცხადა, ქართველი ხალხის ნებას არ ასახავს. დემოკრატიულმა ოპოზიციამ გაიმარჯვა და მთავრობას შესაძლებლობა არ უნდა მივცეთ, რომ ეს მოგვპაროს. ყველა ხმას დავიცავთ და ამ ბრძოლას ერთობლივად, კოორდინაციით ბოლომდე მივყვებით. მნიშვნელოვანია, ამ ბრძოლაში ყველა იმ ადამიანმა მიიღოს მონაწილეობა, ვისთვისაც თავისუფლება, დემოკრატია და საქართველოს ევროპული მომავალი ძვირფასია”. – თქვა ცუცქირიძემ.

მოძრაობაში ამბობენ, რომ ისინი ხვალ, 1-ელ ნოემბერს, სამომავლო გეგმებზე სამსჯელოდ მზიურის პარკში შეიკრიბებიან, სადაც მოქალაქეებსაც ეპატიჟებიან.