ჩემპიონთა ლიგის მერვედფინალის წილისყრა გაუქმდა, უეფამ განმეორებით წილისყრა ჩაატარა – შედეგები

თბილისის დროით 15 საათზე უეფა-ს შტაბ-ბინაში გაიმართა ჩემპიონთა ლიგის 1/8 ფინალის წილისყრა. თუმცა მოგვიანებით იმავე უეფა-მ წილისყრის შედეგები ბათილად სცნო. მიზეზი – გუნდების კალათებში განაწილებისას დაშვებული შეცდომაა.

საქმე ის არის, რომ წილისყრისას კალათიდან „მანჩესტერ იუნაიტედის“ წარწერიანი ბურთულა რომ ამოიღეს, მისი მეტოქე „ვილიარეალი“ უნდა ყოფილიყო, თუმცა რადგან ეს გუნდები ერთ ჯგუფში იყვნენ, „იუნაიტედი“ პსჟ-ს შეხვდა, „ვილიარეალი“ – „მანჩესტერ სიტის“.

მთავარი პრობლემა ის გახლავთ, რომ „მანჩესტერ იუნაიტედი“ შეცდომით მოხვდა იმ კალათაში, რომლის მეტოქეც „ატლეტიკო“ არ უნდა ყოფილიყო. მადრიდელებმა ეს ნიუანსი საჩივრის შესატანად გამოიყენეს და უეფა იძულებული გახდა ხელახალი წილისყრა დაენიშნა.

ასე და ამგვარად, ჩემპიონთა ლიგის წილისყრა დღეს, 13 დეკემბერს თბილისის დროით 18 საათზე ჩატარდა. განმეორებით წილისყრის შედეგად გუნდები შემდეგნაირად დაწყვილდნენ –

ზალცბურგი – ბაიერნი

სპორტინგი – მანჩესტერ სიტი

ბენფიკა – აიაქსი

ჩელსი – ლილი

ატლეტიკო – მანჩესტერ იუნაიტედი

ვილიარეალი – იუვენტუსი

ინტერი – ლივერპული

პარი სენ-ჟერმენი – რეალი

პლეიოფის პირველი მატჩები 15/16 და 22/23 თებერვალს გაიმართება, საპასუხო – 8/9 და 15/16 მარტს.