მომავალი წლიდან აჭარაში მცხოვრები შშმ სტატუსის მქონე დედებისა და ორსულების გარკვეული კატეგორია ერთჯერადი მატერიალური დახმარების სახით 2000 ლარს მიიღებს.
აჭარის ჯანდაცვის სამინისტროს სოციალური დაცვის დეპარტამენტის უფროსი, ინდირა ნაკაიძე განმარტავს, რომ ქვეპროგრამის ფარგლებში გათვალისწინებულ ერთჯერად მატერიალურ დახმარებას მიიღებენ ერთ წლამდე ასაკის ბავშვის შშმ სტატუსის მქონე დედები და შშმ სტატუსის მქონე ორსული ქალები 22 კვირისა და მეტი ვადის ორსულობით.
ინდირა ნაკაიძის განმარტებით, ახალი ქვეპროგრამა შშმ სტატუსის მქონე დედათა და ორსულთა ერთჯერადი მატერიალური დახმარება, ამ ეტაპზე 20 ბენეფიციარისთვის არის გათვლილი.
„ჯერჯერობით ასეა, პილოტურია მაინც ეს პროგრამა, როგორც ბენეფიციარების შესახებ მოგვაწოდეს ინფორმაცია/სტატისტიკა შშმ ადამიანებთან მომუშავე არასამთავრობო ორგანიზაციებმა და მუნიციპალიტეტების წარმომადგენლებმა, ამ ეტაპზე ასეთი 10-15 ქალი ჰყავთ, ჩვენ ცოტა მეტობით ავიღეთ და გავაკეთეთ 20 ქალზე.
პროცესში შეიძლება გამოჩნდეს ცოტა მეტი ბენეფიციარი, ისევე როგორც სხვა პროგრამებში. ასეთ შემთხვევაში წლის განმავლობაში იცვლება ბიუჯეტი და თუ საჭიროება მოითხოვს, დაემატება თანხა. მზაობა არის“, – ამბობს დეპარტამენტის უფროსი.
პროგრამაში ჩასართავად საჭირო დოკუმენტაციაა – პირადობის დამადასტურებელი მოწმობა, შშმ სტატუსის დამადასტურებელი მოწმობა, (შესაბამისი ვადის) ორსულობის ცნობა ან/და ბავშვის დაბადების მოწმობა.
ამ ეტაპზე პროგრამის ბიუჯეტი 40 000 ლარია.
Loading ...