შალვა პაპუაშვილი: აშშ-ის სახელმწიფო მდივნისა და საქართველოს პრემიერს შორის საუბრისას ითქვა, რომ ორივე მხრიდან არის სურვილი ურთიერთობის გადატვირთვის

ჩვენ მზად ვართ ამერიკის შეერთებულ შტატებთან ურთიერთობისთვის ორი ქვეყნის ორი ერის ინტერესების სასარგებლოდ, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

მისივე თქმით, ორივე მხრიდან არის სურვილი, გადაიტვირთოს ურთიერთობა.

პაპუაშვილს კითხვა დაუსვეს საქართველოს პრემიერ-მინისტრის, ირაკლი კობახიძის დღევანდელ განცხადებაზე, რომ მაისის ბოლომდე გაღრმავდება კომუნიკაცია ქართულ და ამერიკულ მხარეებს შორის. კერძოდ, ჟურნალისტმა პაპუაშვილს ჰკითხა, – „რა ელოდება საქართველოს ამერიკასთან ურთიერთობების გადატვირთვის კუთხით?“ – რაზეც პაპუაშვილმა უპასუხა:

„მოვა მაისი და ვნახავთ. მას შემდეგ, რაც საუბარი შედგა ამერიკის სახელმწიფო მდივანსა და საქართველოს პრემიერ-მინისტრს შორის, ამ საუბარში მთავარი რამ გამოითქვა, მთავარ საკითხზე შეთანხმდნენ, რომ ორივე მხრიდან არის სურვილი, გადაიტვირთოს ურთიერთობა. ჩვენი მხრიდან ითქვა, რა არის კრიტერიუმი, როდის შეგვიძლია ვთქვათ, რომ ნამდვილად მოხდა ურთიერთობების გადატვირთვა. ჩვენი მთავარი კრიტერიუმი ახალი სტრატეგიული პარტნიორობის ჩამოყალიბებაა. ამ მიმართულებით მივდივართ. ამ საკითხს ჩვენი ეროვნული ინტერესების გადმოსახედიდან ვუდგებით, ისევე როგორც ამერიკის შეერთებული შტატები უყურებს თავის საგარეო პოლიტიკას საკუთარი ეროვნული ინტერესების გადასახედიდან. სახელმწიფო მდივნის გაცხადებული პოლიტიკაა, რომ ისინი აღიარებენ, რომ სხვა ქვეყნებსაც აქვთ საკუთარი ეროვნული ინტერესები და ნებისმიერ საუბარში ამ ცოდნით შედიან. საქართველო-ამერიკას შორის ურთიერთობა რომ მიუღებელ დონეზეა, ამაში სრულად არის წინა ადმინისტრაციის ბრალეულობა. ამაში საქართველოს თავისი წილი არ მიუძღვის. ასე რომ, ჩვენ როგორც მაშინ, ისე ახლაც მზად ვართ ურთიერთობებისთვის, ორი ქვეყნის ორი ერის ინტერესების სასარგებლოდ“, – განაცხადა შალვა პაპუაშვილმა.