ოზურგეთის მუნიციპალიტეტის საკრებულოს წევრი შალვა თავდიშვილის საქმით სახელმწიფო ინსპექტორის აპარატი დაინტერესდა. ის ბათუმში სამხარაულის კლინიკაში დღეს იმყოფებოდა, სადაც სხვადასხვა ტიპის ექსპერტიზა ჩაუტარდა. როგორც “ნაციონალური მოძრაობის” დეპუტატი აცხადებს,ფიზიკური დაზიანებები გასულ კვირას ოზურგეთის ახალარჩეული საკრებულოს სხდომაზე წარმოქმნილი კონფლიქტის დროს სამართალდამცველებმა მიაყენეს.
”უშუალოდ ინციდენტი უკვე დასრულებული იყო და საკრებულოს სხდომათა დარბაზში ვიჯექი, როცა სამოქალაქო ფორმაში ჩაცმულმა პირმა ჩემი დარბაზიდან გაყვანის ბრძანება გასცა. პოლიციელებმა ძალის გამოყენებით და უხეშად დამატოვებინეს დარბაზი, რა დროსაც დაზიანებები მივიღე ბარძაყის და ბეჭის არეში.”- აცხადებს თავდიშვილი.
მისივე თქმით, პოლიციისთვის და პროკურატურისთვის არ მიუმართავს, რადგან მთავარი მონაწილეები აღნიშნულ საქმეში თავად პოლიციელები არიან და საჩივრით მიმართვის აზრს ვერ ხედავს.
“ერთადერთი სახალხო დამცველის და სახელმწიფო ინსპექტორის აპარატის იმედი შეიძლება გქონდეს ამ ვითარებაში და ვნახოთ, რა იქნება”- დასძინა დეპუტატმა.
Loading ...