ბოჭორიშვილის სახელობის კლინიკის გენერალური დირექტორი დავით გადელია სოციალურ ქსელში კოვიდინფიცირებულებისთვის რჩევებს აქვეყნებს.
ექიმის თქმით, ნებისმიერი დაავადების, განსაკუთრებით კი კოვიდის მკურნალობისას მნიშვნელოვანი ფაქტორი განწყობაა.
“ამ სტატიაში მინდა ცალკე გამოვყო მკურნალობის უმნიშვნელოვანესი ფაქტორი – პაციენტის განწყობა!
რა თქმა უნდა, ყველა დაავადების მკურნალობისას მნიშვნელოვანია ეს ფაქტორი, მაგრამ განსაკუთრებით მნიშვნელობას იძენს ახლა, COVID-19-ის მკურნალობისას, რადგან ჯერჯერობით არა გვაქვს პირდაპირი მოქმედების მედიკამენტი და ძირითად, სიმპტომური მკურნალობის პარალელურად მიმდინარეობს ფილტვის ფუნქციის აღდგენა- რეაბილიტაციის ვარჯიშები.
ისეთი მოცულობის გამოცდილება დაგვიგროვდა, რომ სრულიად თავისუფლად შეგვიძლია მხოლოდ ჩვენი კლინიკის მაგალითებითაც საუბარი; თითქმის არ ყოფილა შემთხვევა, ავადმყოფს აქტიურად, ჩვენთან ერთად შემართებით ებრძოლოს გადარჩენისთვის და დავმარცხებულიყავით!
რამდენი სასწაულებრივი გადარჩენის მოწმე გავხდით უმძიმესი პაციენტების ასეთი გულმოდგინე თანამშრომლობის შედეგად!
როგორც ჩანს, თავად ამ დაავადებამაც იცის მიდრეკილება დეპრესიისადმი, არაადექვატური ქცევები (მათ შორის ჩემს ახლობლებზე დაკვირვებით, რომელთაც კარგად ვიცნობდი), ხელჩაქნეულობა.
ჩვენი პერსონალი დატრენინგებულია პაციენტი მუდამ ბრძოლისკენ იყოს მოტივირებული. მთელი ძალებით ვებრძვით “ხელჩაქნეულობას”, ან როგორც რეანიმაციული დეპარტამენტის უფროსი, ქალბატონი თათა ამბობს გულდაწყვეტით: “- გადაწყვიტა აღარ იბრძოლოს”.
“მინდა ყველას მოგმართოთ, თეზა: “ბრძოლას ყოველთვის აქვს აზრი!” – ისე ალბათ არსად არაა რეალური, როგორც ამ დაავადებასთან ბრძოლისას.
ჯანმრთელებიც და დაავადებულებიც უნდა იყოთ მშვიდად. ვიცი, სათქმელად უფრო ადვილია, ვიდრე გასაკეთებლად, მაგრამ თუ გავითვალისწინებთ სტატისტიკას- შედარება არაა მსუბუქად მიმავალ შემთხვევებსა და გართულებებს შორის, სიკვდილობას – 1% ფარგლებში მხოლოდ- მხნედ უნდა ვიყოთ და დაავადების შემთხვევაში მოვემზადოთ საკმაოდ აქტიური “მუშაობისთვის”.
სხვადასხვა მდგომარეობას, სხვადასხვა ვარჯიშები აქვს, მსუბუქად მიმდინარეებისთვისაც სასარგებლოა გარკვეული აქტიობები!
კოვიდების მკურნალობისას ყველაზე დიდი მტერი ექიმებისთვის და თავად პაციენტებისთვის ნევროტულობა, აფორიაქებაა!
ყოველთვის პირდაპირ აისახება დაავადების პარამეტრებზე, სატურაციაზე.
შეიძლება პერიოდულად ტრანკვილიზატორების, მსუბუქი ანტიდეპრესანტების ჩართვაც, მაგრამ ძალიან მნიშვნელოვანია აუტოტრენინგი, ფსიქოლოგიურად მზად დავხვდეთ დაავადებას!”, – წერს დავით გადელია სოციალურ ქსელში.
Loading ...