საგანგებო რეჟიმი შეფერხებებისა და პრობლემების გარეშე მიმდინარეობს, – ამის შესახებ ქობულეთის მუნიციპალიტეტის მერმა მირიან ქათამაძემ „ინტერპრესნიუსს“ განუცხადა. მისივე ინფორმაციით, ე.წ. ქობულეთის კლასტერს ამ მომენტისთვის კორონავირუსით ინფიცირებული 25 შემთხვევა უკავშირდება. მისივე განცხადებით, კოვიდ19-ის ინფექციის მქონე პირებთან კონტაქტების რიცხვი 370-მდეა გაზრდილი.
„საგანგებო რეჟიმი შეფერხებებისა და პრობლემების გარეშე მიმდინარეობს. ორი ძირითადი პოსტია სოფელ გვარასა და ლეღვარში, სადაც შინაგან საქმეთა სამინისტროსა და თავდაცვის სამინისტროს ძალები მორიგეობენ, ასევე ჯანდაცვის სამსახურის წარმომადგენლები, რომლებიც მოქალქეებს კონსულტაციასა და დახმარებას უწევენ. კორონავირუსით ინფიცირებულთა რიცხვი გუშინ 5-ით გაიზარდა, საერთო ჯამში სულ 25 ინფიცირებული გვყავს, მათგან 2 ბათუმის ზონიდანაა, თუმცა, ქობულეთის კლასტერთან დაკავშირებული. არცერთი შემთხვევა ე.წ. გარე შემთხვევას არ უკავშირდება, ყველა მათგანი იმ კონტაქტების პირთა წრიდანაა, რომლებზეც დაწესებული იყო სპეციალური მეთვალყურეობა. შესაბამისად, კონტაქტების მოძიება გრძელდება. დაახლოებით, 370-მდე არის გაზრდილი სავარაუდო კონტაქტების რიცხვი. ეს იმის მანიშნებელია, რომ ინტენსიური მუშაობა მიდის. ასევე, სპეციალური დაკვირვების ქვეშ რჩებიან ის ადამიანები, რომელთაც თერმოსკრინინგის შედეგად გამოუვლინდათ გარკვეული სიმპტომატიკა, მაგალითად, 37,5 ტემპერატურა. საკარანტინო წესებს მოსალხეობა ჯერჯერობით ზუსტად იცავს“, – განაცხადა ქათამაძემ.
Loading ...