ქიმიური იარაღის გამოყენება საერთაშორისო სამართლის დანაშაულია, ივანიშვილი დაისჯება – თევზაძე

BBC-ის გამოძიებასთან დაკავშირებით კოალიცია ცვლილებისთვის წევრმა, თენგო თევზაძემ ბრიფინგზე ისაუბრა. თევზაძის შეფასებით, ქიმიური იარაღის გამოყენება მშვიდობიანი მომიტინგეების წინააღმდეგ არის საერთაშორისო სამართლის მნიშვნელოვანი დანაშაული, “ამის გამო ივანიშვილი და მისი კრიმინალური ბანდა აუცილებლად დაისჯება”.

“9 აპრილის შემდეგ ქართველი ხალხის წინააღმდეგ ქიმიური იარაღი არ გამოუყენებია არავის. საქართველოს ისტორიაში არცერთ ქართველ ხელისუფალს არ მოუწამლია საკუთარი შვილები და ქართველი ხალხი.

[…] ბიძინა ივანიშვილმა ჩაიდინა წამება და ეს წამება კვალიფიცირდება, როგორც ჩვენი ქვეყნის შიდა კანონმდებლობით, ისე საერთაშორისო სამართლით და საერთაშორისო ინსტიტუციებში მას მოუწევს პასუხის გაცემა იმაზე, რაც ჩაიდინა” – ამბობს თევზაძე.

კოალიცია ცვლილებისთვის წევრმა მიმართა ექიმებსაც. მისი თქმით, ნოემბერ-დეკემბერში “ქიმიური იარაღის” მოწამვლის სიმპტომებით ადამიანების მიმართვიანობაზე ექიმების ჩვენებები იქნება დამნაშავეების დასასჯელად მნიშვნელოვანი.

გამოცემა BBC მოპოვებულ მტკიცებულებებზე დაყრდნობით წერს, რომ გასულ წელს ქართული ოცნების რეჟიმმა ანტისამთავრობო და პროევროპული საპროტესტო აქციების დასარბევად პირველი მსოფლიო ომის დროინდელი ქიმიური იარაღი გამოიყენა.

BBC-ის მიხედვით, ისინი ქიმიური იარაღის ექსპერტებს, საქართველოს სპეცრაზმიდან ინფორმატორებსა და ექიმებს ესაუბრნენ და აღმოაჩინეს მტკიცებულებები, რომელიც “ქიმიური ნივთიერების გამოყენებაზე მიანიშნებს, რომელსაც საფრანგეთის არმიამ ‘კამიტე’ უწოდა.”