ლენტეხში 50 წლამდე ასაკის მამაკაცს კორონავირუსი დაუდასტურდა. ეს ინფორმაცია „რეგინფოს“ ლენტეხის მუნიციპალიტეტის მერმა ბადრი ლიპარტელიანმა დაუდასტურა. ინფიცირებული ლენტეხის სამედიცინო ცენტრშია მოთავსებული, საიდანაც ქუთაისის ინფექციურ საავადმყოფოში ან საჩხერის სამედიცინო ცენტრში გადაიყვანენ.
ეპიდემიოლოგის ლამზირა ბენდელიანის ინფორმაციით, მამაკაცის ჯანმრთელობის მდგომარეობა სტაბილურია. საზოგადოებრივი ჯანდაცვის რაიონული ცენტრის სპეციალისტები ინფიცირებული პირის კონტაქტებს იკვლევენ.
ეს რაჭა-ლეჩხუმ-ქვემო სვანეთის რეგიონში კორონავირუსის პირველი დადასტურებული შემთხვევაა.
საქართველოში კორონავირუსის 211 დადასტურებული შემთხვევაა, მათ შორის გამოჯანმრთელებულია 50 პაციენტი, გარდაცვლილია 3 ადამიანი, კარანტინის რეჟიმშია 4559 მოქალაქე, სტაციონარში მეთვალყურეობის ქვეშ არის 353 პირი.
საქართველოში 21 მარტიდან 21 აპრილამდე საგანგებო მდგომარეობაა გამოცხადებული ახალი კორონავირუსის გავრცელების აღკვეთის მიზნით. 31 მარტიდან საყოველთაო კარანტინი ამოქმედდა და საღამოს 9-დან დილის 6-მდე კომენდანტის საათი მოქმედებს. ჩაკეტილია მარნეულისა და ბოლნისის რაიონები. მთავრობის დღევანდელი გადაწყვეტილებით, სპეციალური კონტროლის რეჟიმი დაწესდა ვანის მუნიციპალიტეტში.
პრემიერ-მინისტრის მრჩეველმა ირაკლი ჩიქოვანმა დამატებითი რეგიონების საკარანტინო ზონად შესაძლო გამოცხადებაზე დღეს განმარტა, რომ ყველა გადაწყვეტილება დაეყრდნობა იმ ვითარებას, რაც იარსებებს კონკრეტულ მუნიციპალიტეტში.
Loading ...