ქართულმა თაფლმა უმაღლესი ჯილდო – პლატინის მედალი მიიღო

თაფლის საერთაშორისო კონკურსზე London Honey Awards 2023 სასოფლო-სამეურნეო კოოპერატივის, „კოდის“ წარმოებულმა თაფლმა „ნინოწმინდის თაფლი – ალპიდა“ ხარისხის ნომინაციაში უმაღლესი ჯილდო – პლატინის მედალი მიიღო. ინფორმაციას გარემოს დაცვისა და სოფლის მეურნეობის სამინისტრო ავრცელებს.

უწყების ცნობით, თაფლის საერთაშორისო კონკურსი London Honey Awards ლონდონში ყოველწლიურად იმართება. კონკურსი აერთიანებს ორ ნომინაციას – თაფლის ხარისხი და შეფუთვა (დიზაინი). კონკურსში მონაწილეობის უფლება აქვთ იმ მეწარმეებს, რომლებიც თავად აწარმოებენ და ყიდიან მხოლოდ საკუთარი წარმოების პროდუქციას.

„კონკურსი London Honey Awards ერთ-ერთი ყველაზე პრესტიჟულია თაფლის წარმოების სექტორში. ყოველწლიურად კონკურსში მონაწილეობს 250-ზე მეტი მწარმოებელი მსოფლიოს სხვადასხვა ქვეყნიდან.

კოოპერატივმა „კოდი“ კონკურსზე London Honey Awards საკუთარი პროდუქცია პირველად 2021 წელს, საქართველოს საელჩოს მხარდაჭერით წარადგინა. London Honey Awards 2021-ზე წარდგენილი იყო „ნინოწმინდის თაფლი ალპიდა“, რომელმაც ვერცხლის მედალი მოიპოვა. აღნიშნული თაფლი ვერცხლის მედლის მფლობელი გახდა London Honey Awards 2022-ზეც.

სასოფლო-სამეურნეო კოოპერატივი „კოდი“ 2017 წელს ოთხი მეფუტკრის ინიციატივით დაარსდა. დღეისათვის კოოპერატივი 11 წევრს, მათ შორის 4 ქალს აერთიანებს.