„ქართული თხილის ფასი შარშანდელთან შედარებით შემცირებულია“ – რა არის მიზეზი?

საქართველოს თხილის გადამამუშავებელთა და ექსპორტიორთა ასოციაციის აღმასრულებელი დირექტორის ლევან ქარდავას ინფორმაციით, ამ ეტაპზე ადგილობრივ ბაზარზე გაუტეხავი თხილის ფასი 5-6 ლარია, საექსპორტო ღირებულება კი 2.5 დოლარის ფარგლებში მერყეობს.

როგორც BM.GE-სთან ქარდავამ განაცხადა, ფასი შარშანდელთან შედარებით შემცირებულია, რაც თურქული ლირის გაუფასურებით აიხსნება.

„ლირაში თხილის ფასი არ შეცვლილა; ამასთან, მოგეხსენებათ, ლირა გაუფასურდა და ეს რომ დოლარზე იყოფა, გამოდის უფრო დაბალი ფასი ვიდრე შარშან იყო ანუ საექსპორტო ფასი დოლარში თურქეთში შემცირდა, შესაბამისად, გვიწევს გავყვეთ თურქულ ფასს“, – განაცხადა ლევან ქარდავამ.

საქსტატის თანახმად, საქართველომ 11 თვეში მსოფლიოს სხვადასხვა ქვეყანაში 22 132 ტონა თხილისა და სხვა კაკლის ექსპორტით 106.4 მლნ დოლარის შემოსავალი მიიღო. ოფიციალური სტატისტიკის მიხედვით, საექსპორტო მოცულობები – 47.7%-ით, ხოლო ღირებულება 30.7%-ით გაიზარდა.

თხილის ძირითადი საექსპორტო ბაზარი ევროკავშირის ქვეყნებია. ამ მიმართულებით 11 თვეში 71.4 მლნ დოლარის ღირებულების 14 342 ტონა თხილის ექსპორტი განხორციელდა. რაც შეეხება თხილის უმსხვილეს საექსპორტო ქვეყნებს, 2021 წლის 11 თვეში TOP-10 საექსპორტო ქვეყანა ასე გამოიყურება:

1. იტალია – 26.6 მლნ დოლარი, 6 815 ტონა;
2. გერმანია – 23.7 მლნ დოლარი, 4 059 ტონა;
3. სომხეთი – 6.8 მლნ დოლარი, 1 595 ტონა;
4. რუსეთი – 5.3 მლნ დოლარი, 1 147 ტონა;
5. ესპანეთი – 4.2 მლნ დოლარი, 696 ტონა;
6. ჩეხეთი – 4 მლნ დოლარი, 691 ტონა;
7. ლიეტუვა – 3.7 მლნ დოლარი, 587 ტონა;
8. საუდის არაბეთი – 3.5 მლნ დოლარი, 535 ტონა;
9. ბელარუსი – 3.4 მლნ დოლარი, 589 ტონა;
10. საფრანგეთი – 2.8 მლნ დოლარი, 452 ტონა.

რაც შეეხება უშუალოდ 2021 წლის თხილის მოსავლის პერიოდს, გარემოს დაცვისა და სოფლის მეურნეობის სამინისტროს ცნობით, 1 აგვისტოდან 2022 წლის 9 იანვრის ჩათვლით, საერთაშორისო ბაზრებზე სულ 17.8 ათასი ტონა თხილი გავიდა, რომლის ღირებულებამ 81.1 მლნ აშშ დოლარი შეადგინა.

www.bm.ge