“ფორმულას” განცხადებით სააკაშვილის ფოტოები არა 1 თვის წინ, არამედ აგვისტოშია გადაღებული

9 დეკემბერს ტელეკომპანია ფორმულამ მიხეილ სააკაშვილის ფოტოები გაავრცელა კლინიკა ვივამედიდან, რომელიც მათი თქმით, “შაბათის ფორმულამ” მოიპოვა.

“ფორმულა” თავდაპირველად აცხადებდა, რომ ფოტოები 1 თვის წინ იყო გადაღებილი, თუმცა კადრების გავრცელებიდან რამდენიმე საათში, ტელეკომპანიამ ინფორმაცია ჩაასწორა და განაცხადა, რომ მათ მიერ მოპოვებული ფოტოების გადაღების ზუსტი თარიღი 29 აგვისტოა.

გავრცელებულ ფოტოებს ინფორმაციის ჩასწორებამდე „ფეისბუკზე“ გამოეხმაურა „ერთიანი ნაციონალური მოძრაობის“ წევრი ეკა ხერხეულიძე, რომელიც იმ ადამიანებს შორისაა, ვისაც კლინიკაში მიხეილ სააკაშვილის მონახულების შესაძლებლობა აქვს. ხერხეულიძე აცხადებს, რომ ფოტოებზე ასახული არაა ექსპრეზიდენტის ამჟამინდელი მდგომარეობა და ის გაცილებით ცუდ მდგომარეობაშია:

„ფოტო,რომელიც გავრცელდა,არ ასახავს საქართველოს მესამე პრეზიდენტის ამჟამინდელ მდგომარეობას. მეტი პასუხისმგებლობა მართებთ, როცა ადამიანის ბედი წყდება და საზოგადოების მაღალ ინტერესს ძველი ფოტოების ტირაჟირებით აკმაყოფილებენ. ნეტა,ისეთ მდგომარეობაში იყოს მიშა,როგორსაც ფოტოზე ვხედავთ.

ადამიანი იმის ნახევარია. იმედია,შეცდომაში შეყვანილი მედია დროულად დაადგენს ფოტოს გადაღების თარიღს. განვმეორდები-ნეტა, ასე გამოიყურებოდეს დღეს მიშა“ – ამბობს ეკა ხერხეულიძე.