ფოთის საკრებულოს ახალი თავმჯდომარე ჰყავს. აღნიშნული პოსტი ხმათა უმრავლესობით „ქართული ოცნების“ დეპუტატმა ბექა ვაჭარაძემ დაიკავა. ფარულ კენჭისყრაში საკრებულოს 21 წევრი მონაწილეობდა, აქედან ვაჭარაძის კანდიდატურას მხარი 19 დეპუტატმა დაუჭირა, ხოლო 2 წინააღმდეგი იყო.
კენჭისყრაში მონაწილეობა არ მიიღო „ნაციონალური მოძრაობის” წევრმა დარეჯან ცხვიტარიამ.
„საკრებულოს წევრების უმრავლესობამ მხარი დაუჭირა ჩემ კანდიდატურას, მადლობა მინდა თითოეულ მათგანს ვუთხრა. საკრებულო კოლეგიალური ორგანოა და ყველა გადაწყვეტილება მიღებულია უმრავლესობით. იმედი მაქვს, რომ მომავალშიც ასე კოლეგიალურად გავაგრძელებთ ყველანი ურთიერთთანამშრომლობას. ვინც ჩემს კანდიდატურას მხარს არ უჭერდა, მათი აზრიც ჩემთვის მნიშვნელოვანია“, – განაცხადა ვაჭარაძემ.
არსებული ინფორმაციით, არჩევნებში მონაწილეობას „ქართული ოცნების“ კიდევ ერთი წევრი თორნიკე შონია აპირებდა, თუმცა, უმრავლესობის გადაწყვეტილებით, კენჭი მხოლოდ ვაჭარაძის კანდიდატურას უყარეს.
ამასთან დაკავშირებით ვაჭარაძემ განაცხადა, რომ არ აქვს ინფორმაცია, თითქოს ვინმე განაწყენებული იყოს.
„ჩვენ შევთანხმდით და ერთობლივი გადაწყვეტილებით, დღეს ნახეთ, რომ საკრებულოს წევრებმა მხარი დამიჭირეს. მე არ ვიცი რატომ დატოვა თორნიკე შონიამ სხდომა. გუნდის შიგნით რამდენიმე კანდიდატურა განიხილებოდა, ჩვეულებრივი პროცესია. გუნდური პრინციპით, ურთიერთშეთანხმებით გადაწყდა ერთი კანდიდატურა,“ – განაცხადა საკრებულოს თავჯდომარემ ბექა ვაჭარაძემ.
ფოთში საკრებულოს თავმჯდომარის არჩევა მას შემდეგ გახდა საჭირო, რაც ყოფილი თავმჯდომარე, ირაკლი კაკულია პასუხისგებაში მიეცა. გამოძიება ამ დრომდე მიმდინარეობს.
Loading ...