ტემპერატურის მატებასთან ერთად, თხილის პლანტაციებში ფაროსანა გააქტიურდა. თხილის მწარმოებელთა ასოციაციის ხელმძღვანელის გიორგი თოდუას განცხადებით, ფაროსანას საწინააღმდეგო ღონისძიებებში სურსათის უვნებლობის სააგენტო აპრილ-მაისიდან ჩაერთო, თუმცა ფერმერების მხრიდან შემხვედრი ნაბიჯები ნაკლებად იდგმება.
გარკვეული ნიჰილისტური დამოკიდებულება ამ თვალსაზრისით თხილის ფასმა გამოიწვია. თუმცა, როგორც თოდუა ,,კომერსანტთან აღნიშნავს, სხვა გამოსავალი რეალურად არ არის და მოსახლეობა თხილის მოვლა-პატრონობის პროცესში უფრო აქტიურად ჩაერთვება.
,,წლევანდელი მოსავლიანობა დიდწილად დამოკიდებული იქნება შედეგზე, რომელიც მავნებელთან ბრძოლაში მიიღწევა. ვერ გეტყვით, რომ ჯერჯერობით ფერმერების დიდი აქტიურობა შეიმჩნეოდეს, ასე ნამდვილად არ არის. ჩვენი მოვალეობაა, რომ მოსახლეობას აუცილებელი აგროღონისძიებების ჩატარებისკენ მოვუწოდოთ. ფასიდან გამომდინარე, ნიჰილისტური დამოკიდებულებაა. ახალ წლამდე 6-7 ლარი ფიქსირდებოდა და მოულოდნელად კლების ტენდენცია დაიწყო. ვისაც პრაქტიკული გამოცდილება აქვს, წამლობას მაინც ახორციელებს, მაგრამ მეტი აქტიურობაა საჭირო“, – ამბობს ,,კომერსანტთან“ გიორგი თოდუა.
თხილის მოსავლის მიღებამდე 2 თვე დარჩა, როგორც თოდუა აღნიშნავს, შედეგი სწორედ აგროღონისძიებებზეა დამოკიდებული.
,,ფაროსანა თხილის პლანტაციებში უკვე გამოჩნდა, სხვა გამოსავალი არ გვაქვს გარდა იმისა, რომ დროულად მიიღონ ზომები და გადაარჩინონ მოსავალი. დღეს სასოფლო-სამეურნეო პროდუქტის ნომერ პირველი მტერი ფაროსანაა. არა მარტო თხილში, ასეა მეხილეობასა და მესიმინდეობაში, ყველგან აბსოლუტურად.წამლობის მიზანი არის მცენარეთა დაცვა. კარგი მოვლის შემთხვევაში ფერმერებმა უნდა მიიღონ, მინიმუმ, 45%-იანი გამოსავლიანობა. ეს იდეალური შედეგია, მით უმეტეს, ირიგაციის გარეშე. შარშან ბევრმა, ვინც 6-ჯერ ჩაატარა წამლობა, 8 ლარად გაყიდეს თხილი, ეს არის ჩვენი მიზანიც, რომ მოსახლეობამ მოსავლისგან რაც შეიძლება მაღალი სარგებელი მიიღოს, – ამბობს გიორგი თოდუა.
შეგახსენებთ, 2016 წლიდან, აზიური ფაროსანას და სოკოვანი დაავადებების გავრცელების შედეგად, თხილის წარმოება (შესაბამისად ექსპორტი) მცირდებოდა და 2018 წელს მინიმალურ ნიშნულს, 17 ათას ტონას მიაღწია.
commersant.ge
Loading ...