ოზურგეთის მუნიციპალიტეტის სოფელ ციხისფერდის მოსახლეობა წყლის პრობლემის მოგვარებას ითხოვს. როგორც მოსახლეობამ გურიაTV–თან საუბარში აღნიშნა, წლებია უწყლობა სოფლის ერთ–ერთი გადაუჭრელი პრობლემაა.
“აქ ზაფხულში უწყლოდ ყოფნა ნამდვილი ჯოჯოხეთია. მოგეხსენებათ, ზაფხულში იმაზე მეტადაა საჭირო წყალი, ვიდრე სხვა სეზონებზე. სოფელია, ბოსტნები აქვთ აქ ხალხს. ყველაფერს რომ თავი დავანებოთ იმისთვის, რომ ელემენტარული მოსავალი გვქონდეს, წყალი გვჭირდება! უამრავჯერ დაგვპირდნენ, მოსულებიც იყვნენ, ადგილები შეამოწმეს ჭაბურღილისთვის. ზაფხული მოდის და უკვე გული მისკდება, რომ წარმოვიდგენ რაც გველის წინ.”
“მოაქვთ წყალი დიდი მანქანით, მაგრამ რამდენ ხანს და რამდენ რამეზე შეიძლება გამოიზოგო ერთი მანქანა წყალი?! თუ ჭაბურღილი ვერ კეთდება, რაღაც სხვა გამოსავალი ხომ უნდა არსებობდეს. ბოდიში მაგრამ ელემენტარულად დაბანა სჭირდება ადამიანს და ზაფხულში აქ ეს შეუძლებელია! ყველაზე უყურადღებო ადგილია მგონი. არასდროს არაფერი არ კეთდება. ერთხელ გაგავიკეთეს განათების ბოძები და კი ბატონო, მადლობლები ვართ და მადლობა კიდევ ერთხელ, მაგრამ როგორ ხედავთ ახლა თქვენ, ამ სოფლისთვის მარტო განათება საკმარისი იყო?!” – აცხადებს სოფელ ციხისფერდის მოსახლეობა.
მერის წარმომადგენელი სოფელ გურიანთაში, გია ფასიეშვილი გურია TV – თან საუბარში ამბობს,რომ ამ პრობლემისთვის გამოიყო თანხა და ჭაბურღილიც უნდა გაკეთებულიყო, მაგრამ ობიექტური მიზეზების გამო ეს ვერ მოხერხდა.
”პირადად მყავდა გეოლოგები მიყვანილი, თანაც არაერთხელ. ამ პროცესში ადგილობრივი მოსახლეობაც ჩართული იყო. საერთოდ, სანამ ჭაბურღილის კეთება დაიწყება, გეოლოგები სპეციალური აპარატის საშუალებით იკვლევენ ადგილს და შემდეგ დებენ დასკვანას, ამოვა თუ არა წყალი კონკრეტულ ადგილზე. ამ შემთხვევაში გეოლოგებმა დადეს დასკვნა, რომლის მიხედვითაც ამ ტერიტორიაზე წყლის ამოსვლა შეუძლებელია. როგორც ჩემთვის არის ცნობილი სოფელ მერიაში კეთდება წყალმომარაგების სისტემა და აქედან მოხდება წყლის მიწოდება ამ უბნისთვისაც.” – განაცხადა გია ფასიეშვილმა.
ავტორი: დიკო მუჯირი
მომზადებულია პროექტის “მეტი მედია განათლება – ნაკლები სივრცე ფეიკ-ნიუსებისა და დეზინფორმაციისთვის” ფარგლებში.
Loading ...