ხარკოვის ოლქიდან ოკუპანტების უკან დახევის დროს, რუსეთის ფედერაციის შეიარაღებული ძალების ბალტიის ფლოტის მე-11 არმიის კორპუსის ნაწილებმა პერსონალის 50% -ზე მეტი და 200 ერთეულზე მეტი სამხედრო ტექნიკა დაკარგეს, – ამის შესახებ უკრაინის შეიარაღებული ძალების გენერალური შტაბის ანგარიშშია აღნიშნული.
უწყების ცნობით, გარდა ამისა, აღმოსავლეთის სამხედრო ოლქის 64-ე ცალკეულმა მოტომსროლელმა ბრიგადამ პერსონალის 90%-ზე მეტი დაკარგა, დაღუპული, დაჭრილი, დეზერტირი და იმ დათხოვნილი სამხედრო მოსამსახურეების სახით, რომლებმაც საომარ მოქმედებებში მონაწილეობაზე უარი განაცხადეს.
„ბრიგადის აღჭურვილობა რუსეთის ფედერაციის უშიშროების ფედერალური სამსახურის სასაზღვრო სამსახურის ქვედანაყოფებს გადაეცემა, სამხედრო ნაწილს კი დაშლისთვის ამზადებენ“, – აღნიშნულია ინფორმაციაში.
უწყების ცნობით, ოკუპანტებმა მნიშვნელოვანი დანაკარგები განიცადეს, როდესაც ავდიივკას მიმართულებით თავდაცვის ძალებზე შეტევა სცადეს. არსებული ინფორმაციით, რუსული ძალების პირველი არმიის კორპუსიდან სამედიცინო დაწესებულებებში ყოველდღიურად 30-ზე მეტი ადამიანი შედის.
„საოკუპაციო ძალა ყველანაირად ცდილობს ქვედანაყოფების საბრძოლო შესაძლებლობების აღდგენას”, – აცხადებენ გენშტაბში.
ამასთან, უწყების ცნობით, გასული დღის განმავლობაში უკრაინის თავდაცვის ძალებმა მტრის თავდასხმები მიხაილივკა დრუჰას, ვესელა დოლინას, ოდრადივკას, მარინკას, ნოვომიხაილივკასა და პრავდინის დასახლებებში მოიგერიეს.
„დღის განმავლობაში უკრაინულმა ავიაციამ მტრის ცოცხალი ძალისა და სამხედრო ტექნიკის კონცენტრაციის 13 ადგილს დაარტყა. გარდა ამისა, ჩვენმა საჰაერო თავდაცვის ნაწილებმა ჩამოაგდეს ხუთი უპილოტო საფრენი აპარატი და მტრის ერთი Ka-52 ტიპის ვერტმფრენი”, – აცხადებენ გენშტაბში.
Loading ...