უკრაინის ეროვნული პოლიციის უფროსის პირველმა მოადგილემ, ვიაჩესლავ აბროსკინმა სოციალურ ქსელში განცხადება გამოაქვეყნა, რომლის თანახმადაც რუსმა ოკუპანტებმა მარიუპოლის სამშობიარო კლინიკაზე საარტილერიო დარტყმა ერთი საათის წინ მიიტანეს.
„რუსმა ოკუპანტებმა მარიუპოლის მე-2 სამშობიაროზე საარტილერიო დარტყმა განახორციელეს. თვითმხილველების თქმით, სამშობიარო სახლი აღარ არსებობს, ასევე ბევრი დაჭრილია და გარდაცვლილია ქალი. რუსებო, თქვენ ჯოჯოხეთში დაიწვებით“, – წერს აბროსკინი.
ამასთან, მარიუპოლის საკრებულოს პრესსამსახურმა გაავრცელა ინფორმაცია, რომ ოკუპანტებმა რამდენიმე ბომბი ბავშვთა საავადმყოფოზეც ჩამოაგდეს.
„ამჟამად რუსეთის საოკუპაციო ძალებმა რამდენიმე ბომბი ბავშვთა საავადმყოფოზეც ჩამოაგდეს, სადაც კოლოსალური ნგრევაა. სამედიცინო დაწესებულების შენობა, სადაც ცოტა ხნის წინ ბავშვები მკურნალობდნენ, მთლიანად დანგრეულია. დაშავებული ბავშვების შესახებ ინფორმაცია ამ დრომდე ზუსტდება. ამას არასდროს დავივიწყებთ! ამ ნაძირლებს ამას არასდროს ვაპატიებთ!“, – ნათქვამია განცხადებაში.
Loading ...