უკრაინის გენპროკურატურის ინფორმაციით, რუსეთის მიერ წარმოებული ომის შედეგად უკრაინაში 90 ბავშვი გარდაიცვალა და 100 დაშავდა

რუსეთის მიერ წარმოებული ომის შედეგად უკრაინაში 90 ბავშვი გარდაიცვალა და 100 დაშავდა. ამის შესახებ ინფორმაციას უკრაინის გენერალური პროკურორის ოფისი ავრცელებს და განმარტავს, რომ ყველაზე მეტი დაშავებული კიევის, ხარკოვის, დონეცკის, ჩერნიგოვის, სუმის, ხერსონის, მიკოლაევისა და ჟიტომირის ოლქებშია.

მხოლოდ გუშინ საღამოს მიკოლაევის ოლქში სამოქალაქო ინფრასტრუქტურის დაბომბვის შედეგად ორი ბავშვი დაიღუპა და სამი დაშავდა.

დაბომბვის შედეგად დაზიანებულია 379 სასწავლო დაწესებულება, რომელთა შორის 59 სრულად არის განადგურებული. ყველაზე მეტი ნგრევა დონეცკის ოლქშია, სადაც 119 სასწავლო დაწესებულებაა დაზიანებული, მიკოლაევში – 30, სუმიში -28, კიევის ოლქში -35, ხერსონის ოლქში -21, დედაქალაქში კი – 24.

„ეს მაჩვენებლები საბოლოო არ არის, იმის გათვალისწინებით, რომ არ არსებობს შემთხვევის ადგილების დათვალიერების შესაძლებლობა, სადაც რუსეთის ფედერაციის შეიარაღებული ძალები აქტიურად იბრძვიან და ასევე დროებით ოკუპირებულ ტერიტორიებზე“, – ნათქვამია გენერალური პროკურატურის განცხადებაში.