100 დღე გავიდა უკრაინის ტერიტორიაზე რუსეთის არმიის შეჭრიდან. დღეს დილის მონაცემებით, ყველაზე ცხელ წერტილად რჩება ლუგანსკის ოლქის ადმინისტრაციული ცენტრი – ქალაქი სევეროდონეცკი და მისი შემოგარენი.
უკრაინის შეიარაღებული ძალების გენერალური შტაბის ინფორმაციით, ბრძოლები გრძელდება სევეროდონეცკის ცენტრში. გენშტაბის ცნობითვე, რუსეთის სამხედრო ქვედანაყოფები უკრაინის თავდაცვის ძალების პოზიციებსა და სამოქალაქო ინფრასტრუქტურაზე შეტევებს განაგრძობენ არა მხოლოდ სევეროდონეცკში, არამედ მის გარშემო მდებარე ლისიჩანსკში, უსტინოვკასა და ბოროვსკოეში. გენერალური შტაბის თანახმად, უკრაინის არმიამ მოწინააღმდეგეს უკან დაახევინა დასახლებულ პუნქტებთან, მეტელკინოსა და ბელოგოროვკასთან.
ამერიკული ანალიტიკური ცენტრის, ომის შემსწავლელი ინსტიტუტის(ISW) ინფორმაციით, სევეროდონეცკში რუსულ არმიას დიდი დანაკარგი აქვს. ცენტრის ექსპერტთა შეფასებით, რუსეთი მაქსიმალურად შეეცდება სევეროდონეცკის და მისი მეზობელი ლისიჩანსკის აღებას, რათა გამოაცხადოს, რომ „გაათავისუფლა“ ლუგანსკის ოლქის მთელი ტერიტორია.
უკრაინაში შეჭრის შემდეგ, რუსეთმა დონეცკის და ლუგანსკის ოლქების ნაწილის გარდა, რომელსაც 2014 წლიდან აკონტროლებს, დაიპყრო უკრაინის ამ ოლქების სხვა ტერიტორიებიც, მათ შორის ქალაქი მარიუპოლი და ასევე, ხერსონის და ზაპოროჟიეს ოლქების ნაწილი. ამ ტერიტორიების რუსეთის შემადგენლობაში შესასვლელად ე.წ. რეფერენდუმების წელს, ზაფხულში ჩატარება არ გამორიცხა რუსეთის დუმის საერთაშორისო საქმეთა კომიტეტის თავმჯდომარემ, ლეონიდ სლუცკიმ. პრეზიდენტ პუტინის ადმინისტრაციაში განაცხადეს, რომ ამის წინაპირობებს ჯერ ვერ ხედავენ.
რუსეთის პრეზიდენტ პუტინს უკრაინის წინააღმდეგ 24 თებერვალს დაწყებული “სპეციალური სამხედრო ოპერაციის” მიზნად გამოცხადებული აქვს უკრაინის “დემილიტარიზაცია და დენაციფიკაცია”.
უკრაინის ტერიტორიაზე რუსული არმიის შეჭრას წინ უძღოდა პუტინის მიერ უკრაინის ორი სეპარატისტული რეგიონის, დონეცკის და ლუგანსკის ე.წ. სახალხო რესპუბლიკების “დამოუკიდებლობის” აღიარება. მანამდე რუსეთმა მოითხოვა, რომ უკრაინა არ გახდეს ნატოს წევრი.
უკრაინაში რუსეთის არმიის შეჭრის შემდეგ, დასავლეთის სახელმწიფოები, განსაკუთრებით აშშ, უკრაინას უწევენ მნიშვნელოვან სამხედრო დახმარებას, რომელსაც ახლახან პირველად დაემატა სარაკეტო სისტემები. ამ ტიპის შეიარაღებას უკრაინა განსაკუთრებით აქტიურად ითხოვს მას შემდეგ, რაც რუსეთმა ძირითადი ძალები გადაისროლა უკრაინის აღმოსავლეთში, “დონბასზე სრული კონტროლის დასამყარებლად”.
www.radiotavisupleba.ge
Loading ...
