უკრაინამ მოითხოვა სააკაშვილის დროებით გადაცემა – მხარეებს შორის მოლაპარაკებები ხდება- ხაჭაპურიძე

სახელმწიფოს აქვს ამის ვალდებულება, თუმცა არის საკითხები, როდესაც მხარეებს შორის მოლაპარაკებები ხდება და გარკვეულ დათმობებზე მიდიან, – ამის შესახებ საქართველოს მესამე პრეზიდენტის, მიხეილ სააკაშვილის ადვოკატმა, შალვა ხაჭაპურიძემ ყოფილი პრეზიდენტის საქართველოდან უკრაინაში გადაცემის და მოწმის სახით დაკითხვაზე საუბრისას განაცხადა.

რაც შეეხება სააკაშვილის ჯანმრთელობის მდგომარეობას, ადვოკატის ინფორმაციით, მიხეილ სააკაშვილი საწოლიდან ვერ დგება და სხვადასხვა დაავადებები აწუხებს, რომელთა შორის ერთ-ერთი ხერხემლის პრობლემაა. მისივე თქმით, დღეს 17:00 საათზე ჯანდაცვის სამინისტროში შეხვედრაა დანიშნული, რომელზეც ამერიკელი ექსპერის, ჯეიმს კობის კლინიკა ,,ვივამედში” შეშვების საკითხზე იმსჯელებენ.

,,დღეს ვთხოვთ ნინო ნადირაძეს, ,,ვივამედის” დირექტორს, რომ იქნებ მისი მეშვეობით მოხერხდეს ამერიკელი ექსპერტის შეყვანა. ასევე ვთხოვთ დახმარებისთვის სახალხო დამცველს, რომელთანაც 1 კვირაა ვაწარმოებთ მოლაპარაკებას. დღეს 17:00 საათზე გაიმართება ჯანდაცვის სამინისტროში სხდომა, სადაც უნდა გადაწყდეს ბატონი კობის და კიდევ ერთ ექიმზე ნებართვის გაცემა, თუმცა ის ჩამოსვლას არ აპირებს და ავადმყოფის ისტორიაზე დაყრდნობით ჩაატარებს ექსპერტიზას. სახელმწიფოს აქვს ამის ვალდებულება, თუმცა არის საკითხები, როდესაც მხარეებს შორის მოლაპარაკებები ხდება და გარკვეულ დათმობებზე მიდიან. ეს ორი სახელმწიფოს იუსტიციის სამინისტროებს შორის გადასაწყვეტი საკითხია. ფაქტია, რომ უკრაინამ მოითხოვა სააკაშვილის დროებით გადაცემა”, – აღნიშნა შალვა ხაჭაპურიძემ.