უკრაინა წიწიბურის, შაქრისა და მარცვლეულის ექსპორტს კრძალავს

უკრაინის მთავრობამ ჭვავის, ქერის, წიწიბურას, ფეტვის, შაქრის, მარილისა და ხორცის ექსპორტი მიმდინარე წლის ბოლომდე აკრძალა. ამასთა, რუსეთში შეფერხებულია ფულადი გადარიცხვები. „დისტრიბუტორთა ბიზნეს-ასოციაციის“ ხელმძღვანელს ივა ჭყონია გვიყვება, რომ რუსეთიდან და უკრაინიდან შემოსულ სასურსათო პროდუქციას ქართული ბაზრის 60%-ზე მეტი წილი უკავია. ამის მიუხედავად ბიზნესმენი აცხადებს, რომ ქართულ ბაზარს პირველადი მოხმარების პროდუქტების დეფიციტის საფრთხე არ ემუქრება. მისი თქმით, კომპანიები აქტიურად მუშაობენ სხვა, ალტერნატიული ბაზრების მოძიებაზე. როგორც ივა ჭყონია ამბობს, ყველაზე აქტიურად თურქეთი განიხილება.

„ქვეყანაში გარკვეული მარაგები არის, მაგრამ პროდუქტები, რომელიც უკრაინიდან შემოდიოდა – წიწიბურა, ზეთი, ფქვილი და ასე შემდეგ, სამწუხაროდ, აღარ შემოდის. ამ ეტაპზე რუსეთიდან იმპორტზე შეფერხება არ შეინიშნება, თუ არ ჩავთვლით ფულად გადარიცხვებს, რაც გაპრობლემდა. რა თქმა უნდა, პარალელურად მიდის ალტერნატიულ ბაზრებზე მუშაობა, საიდანაც შევძლებთ პროდუქტების წამოღებას. ეს ცალსახად ნეგატიურად აისახება ჩვენს ბაზარზე იმიტომ, რომ გაცილებით ძვირი ეღირება. ყველაზე აქტიურად თურქეთი განიხილება, რადგან ახლოსაა. აგრეთვე განიხილება ჩვენი პარტნიორები ევროკავშირიდან, მაგრამ ყველაფერს რომ თავი დავანებით, ლოგისტიკის ნაწილში პროდუქციის შემოტანა საკმაოდ ძვირი იქნება. აქედან გამომდინარე, მოლოდინები არასახარბიელო გვაქვს, თუმცა, დეფიციტის საფრთხე არ გვემუქრება. შეიძლება რაღაც დასახელების ზეთი ვერ ნახოთ, მაგრამ ნახავთ სხვას. მაგალითად გავიგეთ, რომ „ნემიროვის“ და „სანდორას“ ქარხნები გაჩერებულია. თუ ვერ ნახავთ არაყ „ნემიროვს“ შეგხვდებათ სხვა. ალტერნატივა ყოველთვის არის. ის რომ რომელიმე პროდუქტი, მაგალითად წიწიბურა ან ბრინჯი დეფიციტში იყოს, ეს საკითხი დღის წესრიგში არ დგას, უბრალოდ მივიღებთ შეცვლილი ფასით“, – განმარტავს ივა ჭყონია.

commersant.ge