სტუდენტები ჯარის გავლას სწავლის პერიოდშივე შეძლებენ – ღარიბაშვილი

საქართველოს მთავრობის ინიციატივით, სამხედრო სავალდებულო სამსახურისთვის 4 წლიანი პროგრამა იქმნება.

ამის შესახებ პრემიერმინისტრმა ირაკლი ღარიბაშვილმა მთავრობის სხდომაზე ისაუბრა. პროგრამის თანახმად, 33 წლამდე ბიჭებს, რომლებსაც სურვილი ექნებათ, რომ სტუდენტობისას გაიარონ სავალდებულო სამსახური, 4 წლის განმავლობაში ყოველ წელს ერთი თვე მოუწევთ სამხედრო ბაზაზე ინტენსიური მომზადება. 4 წლის შემდეგ სახელმწიფო მათ სავალდებულო სამხედრო სამსახურს მოხდილად ჩაუთვლის.

“ვინც გადაწყვეტს, რომ სამხედრო წვრთნა გაიაროს სტუდენტობის პერიოდშივე 4 წლის ვადაში, მას შეეძლება ამ პროგრამაში ჩაერთოს. 1-თვიანი ინტენსიური მომზადების პროგრამა იქნება სამხედრო ბაზებზე და გაივლიან იდენტურ ან ძირითად სამხედრო-საბრძოლო მომზადების პროგრამას. პროგრამა 4-წლიანი იქნება, წელიწადში 1 თვე მოუწევთ მათ სამხედრო ბაზებზე მომზადება და სტუდენტობის დასრულებისთანავე, 4 წლის შემდეგ, მათ ჩავუთვლით სავალდებულო სამხედრო სამსახურს მოხდილად”, – თქვა ღარიბაშვილმა.