„სტრატეგია აღმაშენებლის“ საარჩევნო სიის მე-10 ნომერმა, ქუთაისის ყოფილი მერმა, გია თევდორაძემ კორონავირუსზე ტესტი მას შემდეგ ჩააბარა, რაც მის მეუღლეს, მაკა ხეცურიანს კორონავირუსი დაუდასტურდა. ხეცურიანი ქუთაისის აკაკი წერეთლის სახელობის უნივერსიტეტის თანამშრომელია. როგორც მან „2020NEWS”-ს ექსკლუზიურად განუცხადა, მას შემდეგ, რაც ვირუსის სიმპტომები გამოუვლინდა, მეუღლეც თვითიზოლაციაში გადავიდა. „2 დღის წინ გამომივლინდა პირველი სიმპტომები, მქონდა ტემპერატურა. ტესტირების შედეგად, კორონავირუსი დამიდასტურდა. როგორც კი პირველი სიმპტომი გამომივლინდა, გიაც თვითიზოლაციაში გადავიდა და ყველა შეხვედრა გააუქმა. მან ტესტი დღეს აიღო და ველოდებით პასუხს, თუმცა სიმპტომები ამ ეტაპზე არ აღენიშნება“, – განაცხადა მაკა ხეცურიანმა. ქუთაისის ყოფილი მერის მეუღლე მკურნალობას ქალაქის ინფექციურ საავადმყოფოში გადის.
დღესვე ახალი კორონავირუსი დაუდასტურდა ქუთაისის საკრებულოს მაჟორიტარ დეპუტატს, მერაბ კვიცარიძესაც. ავტოქარხნის დასახლების მაჟორიტარს ცხელების სიმპტომები გუშინ ჰქონდა, დღეს კი კორონავირუსზე ჩატარებული ტესტით ვირუსი დაუდასტურდა. სააგენტოს ინფორმაციით, კვიცარიძე მკურნალობის კურსს კოვიდ-სასტუმროში გადის. ცნობისთვის, ბოლო 24 საათის განმავლობაში იმერეთის რეგიონში კორონავირუსის უპრეცედენტო რაოდენობა დაფიქსირდა. „კოვიდ-19“ 150 ადამიანს დაუდასტურდა, საიდანაც 101 შემთხვევა ქუთაისზე მოდის.
Loading ...