თურქული ლირა ქვეყნის პრეზიდენტის რეჯეფ ტაიპ ერდოღანის ორშაბათის განცხადების შემდეგ გამყარებას განაგრძობს. საფონდო ბირჟის Ahlatçı Investment გენდირექტორის მოადგილემ ტონგუჩ ერბაშმა ტელეკომპანია A Haber-ის ეთერში დღეს, 23 დეკემბერს, სენსაციური განცხადება გააკეთა და თქვა, რომ წლის ბოლომდე დოლარი, შესაძლოა, 5-6 ლირამდე დავარდეს.
თურქული ვალუტის მხარდამჭერი ბოლო გადაწყვეტილებების შემდეგ ლირა მკვეთრად გამყარდა და რეკორდული 18,40-იანი ნიშნულის შემდეგ დოლარი 30%-ით შემცირდა. ექსპერტების აზრით, ბიზნესი იმის მიხედვით აღიდგენს წონასწორობას, თუ რეალურად როგორ განხორციელდება ეკონომიკის ახალი მოდელი.
თურქეთის მთავრობამ ექსპორტიორ კომპანიებს, ლირის გაუფასურების პირობებში, ფორვარდული სავალუტო კურსი შესთავაზა. ამის შესახებ ერდოღანმა 20 დეკემბერს გამართული მთავრობის სხდომის შემდეგ განაცხადა.
„თურქულ კომპანიებს, რომლებსაც გაცვლითი კურსის მერყეობის გამო უჭირთ ფასების დადგენა, ფორვარდულ სავალუტო კურსს შევთავაზებთ პირდაპირ ცენტრალური ბანკისგან“, – განაცხადა თურქეთის ლიდერმა.
წყარო: commersant.ge
Loading ...
