საქართველოში კოვიდ-სიკვდილიანობის მაჩვენებელი ზღვრულზე ორჯერ მეტია – გამყრელიძე

დაავადებათა კონტროლის ეროვნული ცენტრის ხელმძღვანელის განცხადებით, დღეს საქართველოში კოვიდსიკვდილიანობის მაჩვენებელი ზღვრულზე ორჯერ მეტია. ამის შესახებ ამირან გამყრელიძემ საკოორდინაციო საბჭოს დასრულების შემდეგ საქართველოში ეპიდემიოლოგიური მდგომარეობის შეფასებისას განაცხადა.

მისი თქმით, ამის პარალელურად დეკემბერში ვაქცინაციის პროცესი მცირედით გააქტიურდა, რაშიც გარკვეული როლი 60 წელს ზევით ასაკის მოსახლეობის მონეტარულმა წახალისებამ შეასრულა.

„ერთადერთი მაჩვენებელია, რაც სამწუხაროდ ზემოთ წავიდა, ყველაზე მძიმე ინდიკატორი – სიკვდიალიანობის მაჩვენებელია, ის მილიონ მოსახლეზე 17-ია, რაც ჩვენს ზღვრულ ინდიკატორზე ორჯერ მეტია.

დეკემბერში აცრების მოცვა და მაჩვენებელი უკეთესია. ბოლო 30 დღის საშუალო 10 000-ზე მეტია, ხოლო ბოლო ერთი კვირის – 11 000-ზე მეტია, ანუ ნოემბრიდან 60 წელს ზემოთ ადამიანების წახალისების მექანიზმმა გარკვეული როლი ითამაშა. ამ პერიოდში ამ ასაკობრივ კატეგორიაში 114 000 ადამიანი აიცრა. პირველი აცრით ამ ასაკის 50%-ზე მეტის მოცვა მოხდა. ასევე მიმართვიანობა ნორმალურია იგივე პირების მეორად აცრებზე. დაახლოებით 23%, ვისაც მეორე აცრის გაკეთება ეკუთვნოდა, აცრაზე მისული არ არის. ამიტომ შეიძლება ითქვას, რომ მონეტარულმა წახალისებამ იმუშავა“, – განაცხადა ამირან გამყრელიძემ.

შეგახსენებთ, ბოლო 24 საათში კორონავირუსით კიდევ 63 მოქალაქე გარდაიცვალა. ჯამში ვირუსს 13 646 ადამიანი ემსხვერპლა.