საქართველოში ისრაელის საელჩომ მუშაობა შეაჩერა

საქართველოში ისრაელის საელჩო დღეიდან, 30 ოქტომბრიდან მუშაობას აჩერებს, – ამის შესახებ საელჩოს Facebook-ის გვერდზეა ნათქვამი.

„გაცნობებთ, რომ ისრაელის საგარეო საქმეთა სამინისტროს გაფიცვის გამო, 30 ოქტომბრიდან ისრაელის საელჩო და საკონსულო განყოფილება საქართველოში არ იმუშავებს შემდგომ შეტყობინებამდე“, – ნათქვამია განცხადებაში.

ისრაელის მედია წერს, რომ საელჩოების და საკონსულოების მუშაობა მთელი მსოფლიოს მასშტაბით იზღუდება.

ამის მიზეზი ისრაელის საგარეო საქმეთა და თავდაცვის სამინისტროების შრომითი კომიტეტების გაფიცვა გახდა.

კომიტეტის წარმომადგენლების თქმით, ეს ქმედება ერთადერთია იმ გადაწყვეტილების საპასუხოდ, რომელიც ქვეყნის ფინანსთა სამინისტრომ მიიღო, კერძოდ, მსოფლიოში დიპლომატებისა და წარმომადგენლობების ხარჯის შემცირებასთან დაკავშირებით.

როდის შეწყდება გაფიცვა ჯერჯერობით უცნობია.