საქართველოში იმპორტირებული სიგარეტი სავარაუდოდ გაძვირდება – დღეიდან აქციზი იზრდება

იმპორტირებული სიგარეტი ქვეყანაში სავარაუდოდ გაძვირდება, ამის მიზეზი კი მასზე გაზრდილი აქციზის გადასახადია.

შეგახსენებთ, რომ 1-ლი იანვრიდან 1 კოლოფ იმპორტირებულ სიგარეტზე აქციზი 85 თეთრით იზრდება. კერძოდ, დღეიდან 35 მილიონ კოლოფზე/შეფუთვაზე მეტი ადგილობრივი წარმოების სიგარეტები, თამბაქოს შემცველობით, ასევე იმპორტირებული სიგარეტები დაიბეგრება 20 ღერზე 2.75 ლარის ოდენობის აქციზის განაკვეთით. აღსანიშნავია, რომ იმპორტირებულ სიგარეტზე აქციზი იქამდე 20 ღერზე 1.90 ლარს შეადგენდა.

ამასთან, 1-ლი იანვრიდან მცირდება აქციზის განაკვეთი ადგილობრივად წარმოებულ სიგარეტზე. კერძოდ, ადგილობრივი წარმოების სიგარეტები, თამბაქოს შემცველობით, ყოველწლიურად 35 მილიონ კოლოფამდე/შეფუთვამდე დაიბეგრება 20 ღერზე (ერთ კოლოფზე) 1.30 ლარის ოდენობის აქციზის განაკვეთით. ცნობისთვის, აქციზის განაკვეთი ამ შემთხვევაში იმპორტირებულის მსგავსად, 1.90 ლარი იყო, შესაბამისად, საქართველოში წარმოებულ კოლოფ სიგარეტზე 60 თეთრით მცირდება.